Møtte delfin i fjorden

Den 21 år gamle økonomistudenten Joakim Svoren Årvik var i grunn på fisketur saman med tre kameratar då dei fekk hakeslepp. For i fjorden trefte dei på ein krabat dei aldri hadde sett før.

- Vi fekk i grunn litt sjokk. Delfinen var omtrent halvannan meter og symde ved sida av båten vår halvannan time, hoppa og styra på, seier Svoren Årvik.

Les om ein annan sjeldan gjest i fjorden:

• Keiko-grav vert minnesmerke
• Keiko-skilt i Halsa
• Linda Eide minnast Keiko

Trudde det var nise

Først trudde kameratgjengen det var ei langt vanlegare nise dei hadde fått besøk av, men etter å ha studert bileta i ettertid, er 21-åringen sikker på at det var ein delfin dei såg tysdag.

- Vi har vist fram bileta til mange, og vi har konkludert med at det sikkert er ein delfin av typen kvitskjeving eller tumle.

Får støtte av ekspert

Akvarist Jan Einarsen i Ålesund støttar kameratgjengen på at dei truleg har møtt ein delfin i bukta mellom Dimna og Ulsteinvik, rett utanfor Kleven verft i Ulstein.

- Det er veldig artig når denne krabaten dukkar opp, for det skjer ikkje veldig ofte, seier Einarsen. Han anslår at han høyrer om delfinar inne ved kysten eit par gongar i året.

Lever i Norskehavet

Einarsen seier delfinen er på evig jakt, og at det truleg er sild eller makrell som har lokka han inn til land.

- I tidlegare tider jakta dei på delfin til mat, men no for tida er det sjeldnare vi ser han på nært hald, seier akvaristen.