Den nye kostnadsprognosen for Møreaksen var akkurat klar til Transportkomiteen i Stortinget kom på besøk til Molde onsdag. Ifølgje Nasjonal Transportplan skulle vegen koste 39,5 milliardar kroner. No er dette redusert til 23,1 milliardar.
– Reisetida nesten den same
Det er valgt enklare løysingar. Men dette skal, ifølgje vegvesenet, ikkje føre til vesentleg auka reisetid mellom byane Ålesund og Molde.
– Der vi opphavleg opererte med kutt i reisetida på ein time så oppnår vi med 23,1 milliardar kroner ein reduksjon i reisetida på 50 minutt. Det er vi svært fornøgde med, seier strategisjef i Statens vegvesen, Kjetil Strand.
Ferjefri E39
Møreaksen er ein del av gigantprosjektet «Ferjefri E39» mellom Kristiansand i sør og Trondheim i nord. Det overordna prosjektet blei vedteke av Stortinget under behandlinga av Nasjonal transportplan i juni 2017.
Vegen går gjennom seks fylke og er innom byane Kristiansand, Stavanger, Bergen, Ålesund, Molde og Trondheim. Vegen blir om lag 1100 lang og kortar ned reiseavstanden med 50 kilometer.
Prosjektet kryssar Boknafjorden, Langenuen, Bjørnafjorden, Sognefjorden, Nordfjorden, Vartdalsfjorden, Sulafjorden, Romsdalsfjorden og halsafjorden. Mellom fjordkryssingane skal det i stor grad byggast nye vegstrekningar.
Billegare løysingar
Vegen mellom Ålesund og Molde har fått namnet «Møreaksen». Opphavleg blei dette planlagt som firefelts veg tilrettelagt for ei fart på 110 kilometer i timen. No går planen ut på å bygge vegen som to- og trefeltsveg i første omgang og utvide til fire felt etter behov seinare. Og det blir valt enklare og billegare løysingar på nokre område. Det er forklaringa på den drastiske reduksjon i prislappen.
– Den største effekten i arbeidet med å få ned kostnadene er å forandre prosjektet frå fire-felts veg til tre felt, seier Strand.
Billegare og smalare bru
Det er også henta inn ein vesentleg kostnadsreduksjon på brua over Julsundet. Vindmålingar viser at hengebrua kan byggjast smalare enn det ein trudde tidlegare.
– Sjølve vegbreidden på brua blir den same, men brukassa kan byggjast smalare, seier strategisjef Kjetil Strand i vegvesenet til NRK.
Her er det i stor grad materialkostnadene som blir lågare ved den nye løysinga.
– Politisk press
Dei nye kostnadsoverslaga kjem som eit svar på eit krav frå samferdsleminister Jon Georg Dale (Frp) om at kostnadene i prosjektet måtte ned. 8. september 2018 sa Dale at det var heilt avgjerande å redusere utgiftene om prosjektet skulle realiserast.
– Vi har gjort dette arbeidet på grunn av dei politiske signala om å få ned kostnadene. Så vi har følt eit press for å få dette til, seier Strand.
– Burde ha valt 4 felt
Ikkje alle er like nøgde med at vegvesenet har gått ned frå firefelts veg til ein veg med berre tre felt. Ein av dei er Tor André Johnsen som sit i Transportkomiteen for Framstegspartiet. Han meiner dagens løysing er kortsiktig.
– Dette er ikkje framtidsretta. Det er kortsiktig å måtte byggje om til fire felt på eit seinare tidspunkt. Dette blir som å byggje ei enkeltgarasje når du allereie har to bilar, seier Johnsen.