Møre og Romsdal har aldri hatt eit eige fylkeslag for lesbiske og homofile. Men etter nyttår satsar Landsforeningen for lesbisk og homofil frigjøring (LLH) på å starte opp også her, fortel John Trygve Tollefsen frå LLH.
- All openheit og all synlegheit er viktig. At folk
får sjå at vi er ein naturleg del av bybildet vil gjere det lettare for andre som kanskje ikkje heilt har funne sin plass, seier Tollefsen.
Stolte homofile
- For LLH er det viktig at vi har opne, stolte lesbiske og homofile over heile landet. Det er viktig å vise at kven som helst kan vere homofil, og at vi fins overalt. Difor er det viktig å også starte opp eit fylkeslag i Møre og Romsdal, forklarer Tollefsen.
Med eit eige fylkeslag kan det bli lettare for homofile å stå fram, og lettare å etablere eit nettverk, trur Tollefsen.
Homofile flyttar til byane
- Eg trur det er svært viktig for dei som er skeive i Møre og Romsdal at dei no får på plass eit fylkeslag, seier Kamilla Øren Eidsvik.
Eidsvik er opprinneleg frå Haram kommune, men bur no i Oslo og er leiar for Skeiv Ungdom.
- Homofile flyttar i langt større grad enn heterofile til dei større byane. Det er fordi der er betre nettverk for homofile, seier Eidsvik.
- Problemstillinga i Møre og Romsdal er ikkje at det ikkje fins andre som er skeive, men at det ikkje fins ein organisasjon som samlar dei.
Vil gjere det lettare å stå fram
Kamilla Øren Eidsvik har stor tru på at eit fylkeslag vil gjere det lettare å vere homofil, også i Møre og Romsdal.
- For det første vil det gi dei skeive meir tryggheit i forhold til seg sjølv. Dessutan kan det vere med på å endre haldninga til folk. At nokon er med på å bryte opp forventninga om at alle er heterofile. Når ein bryt opp, vil det gjere det lettare for fleire å følge etter, seier Eidsvik.
Møre og Romsdal - ei sinke?
At Møre og Romsdal er det einaste fylket i landet som ikkje har eige fylkeslag for lesbiske og homofile overraskar ikkje Eidsvik.
- Det har vore vanskeleg å få tak i ressursar og menneske som tør å stå fram i Møre og Romsdal. Det handlar om dei normene og forventningane som fins. Eg trur Møre og Romsdal er litt konservativt i forhold til religion og haldningar til homofili. Noreg generelt er ganske homofobisk, men eg trur Møre og Romsdal heng litt meir etter.
- Eg trur eit fylkeslag vil bety mykje for folk som bur i Møre og Romsdal. Det hadde vertfall betydd mykje for meg om det fantes eit slik fylkeslag då eg budde der, seier leiaren for Skeiv Ungdom.