Hanne Marie Pedersen-Eriksen forlèt Ålesund utan den faste jobben som prest som ho ønskte seg. Ho treivst, lokalsamfunnet tok godt imot henne, og ho vil slå seg ned. Men biskopen i Møre sa nei fordi presten hadde planar om å gifte seg med ei anna kvinne.
No er den omstridde praksisen med å spørje prestar om samlivsform igjen tema i Den norske kyrkje. Det er Pedersen-Eriksen glad for.
– Eg håper vi no kan få ei lik ikkje-diskriminerande praksis i heile Den norske kyrkje, seier Hanne Marie Pedersen-Eriksen.
Vil framleis spørje
Det er Kyrkjerådet som har sendt på høyring eit forslag om at praksisen blir ulovleg i Den norske kyrkje.
Det har vekt uro fleire stader i landet, som i Agder og Telemark.
No foreslår også Møre bispedømme at det framleis skal vere lov. Det går fram av innstillinga frå administrasjonen som er sendt ut før bispedømmerådsmøtet førstkomande måndag.
I innstillinga til møtet i Møre bispedømme står det at å nekte alle kyrkjelydar å spørje om samlivsform vil kunne føre til djupare kløft mellom meiningsmotstandarar i kyrkja.
Snudde nettopp sjølv
Dette skjer berre månader etter at bispedømmet sjølv gjekk vekk frå praksisen.
Biskop Ingeborg Midttømme sa då at formuleringa i jobbannonsane har skapt uro og smerte for andre menneske, og at ho ikkje kan stå for det lenger.
– Eg håper det kan nå fram til nokon som har ikkje har kjent seg respektert og verdsett for den dei er, seier Midttømme.
Biskop Ingeborg Midttømme ønskjer førebels ikkje å kommentere saka. Det ønskjer heller ikkje personalsjefen i Møre bispedømme som har skrive saksframlegget.
Ho skriv i ei tekstmelding til NRK at ingen ved kontoret vil kommentere saka før den er behandla måndag.
Biskop Ingeborg Midttømme.
Foto: Roar Strøm / NRKMagne Lerø er redaktør og kommentator og seier han trur Møre bispedømme er redd for at spenningane skal auke. Stadig færre bispedømme har praktisert løyvet til å spørje om samlivsform dei siste åra.
– Utviklinga går i den retninga, og dei er difor redde for at splittinga aukar dersom Kyrkjemøtet skal presse gjennom eit syn i ei sak som det har vore delte meiningar om i lang tid, seier han.
Skuffa
Therese Utgård Aas i Åpen Folkekirke, som også sit i bispedømerådet og Kyrkjerådet er skuffa over forslaget administrasjonen har kome med.
– Eg trudde vi hadde gått vidare. Eg tok til meg dei fine orda som kom frå biskopen og andre i bispedømerådet sist. Kyrkja skulle endeleg ta innover seg all sorg og skam den hadde påført alle skeive, seier ho.
– Eg syns det er veldig synd viss ein snur i saka no.
Administrasjonen argumenterer med at det å nekte alle kyrkjelydar å spørje om samlivsform vil kunne føre til djupare kløft?
– Det er ikkje dei konservative som er eit offer her. Det er skeive som alltid har blitt nekta å delta i fellesskapet i kyrkja. Vi må eit syn på menneskeverd. Det kan ikkje vere ei kløft mellom folk når det gjeld kva andre folk er verdt, seier Aas.
Flytta til København
Hanne Marie Pedersen-Eriksen er i dag prest i København, og tvilar på at ho nokon gong kjem tilbake til Møre. Ho har ikkje lese innstillinga til Møre bispedømmeråd, og vil ikkje kommentere den konkret.
– Eg har gjennom dei siste åra ytra meg om korleis tilsettingspolitikken til Møre bispedømme blir opplevd. Utover det har eg ingen ny kommentar, seier ho.
Kyrkjemøtet skal behandle saka seinare i år.
