Konsentrasjonen er på topp idet neste runde med sjakk setter i gong. Kvar måndag møter nordmenn og ukrainske flyktningar kvarandre over sjakkbrettet i Molde.
– Det er kjekt, for eg liker å spele sjakk og snakke med folk. Om eg ikkje hadde vore her, hadde eg sikkert berre vore heime og spelt data, seier Kostiantyn Stasheniuk (13).
Saman med Ruslan Savosko (9) er han blant dei ukrainske flyktningane som har blitt ein del av sjakklubben i Molde.
– Det er lettare å bli kjent med folk på denne måten, og vi har lært både litt norsk og engelsk, seier dei to, medan dei ramser opp nokre av dei norske orda dei har lært seg.
Også mora til Ruslan, Maryna Savosko, ser fordelane ved å vere ein del av den lokale sjakklubben.
– Her får vi snakka med dei lokale, noko som gjer det enklare å lære språket. I tillegg er det veldig viktig å ha noko å gjere på her, seier ho.
– Viktig integreringstiltak
Ideen bak integreringstiltaket var det Tor Wetle Wetlesen, leiar i Molde sjakklubb, som hadde. Han har tidlegare jobba ved vaksenopplæring og veit kor viktig det er å lære språket for å bli integrert.
Wetlesen tok difor kontakt med vaksenopplæringa i Molde og presenterte sjakklubben for dei som går der. Og responsen var umiddelbar.
– Veka etter kom det 20 stykke. Alle framandspråklege er velkomne, ikkje berre dei frå Ukraina, men det var på grunn av situasjonen der at eg kom på dette.
Wetlesen meiner at sjakk er godt egna til å integrere personar i eit nytt samfunn. Gjennom ein felles hobby kan ein både finne vennar med same interesse og lære språket samtidig.
– Vi starta med å lære dei norske namna på sjakkbrikkene. Sjakk er eit spel der du kan sette deg ned med kven som helst, uavhengig av språk, kjønn og alder. Det er ein rimeleg hobby og alle kan lære det. Her slår niåringane dei på 60, seier han.
Positivt for alle partar
No har sjakklubben også fått 100.000 kroner i integreringsmiddel frå Møre og Romsdal fylkeskommune. Pengane går mellom anna til utstyr, læremateriell og ein tolk for å lette kommunikasjonen.
Og dei nye medlema har bidratt til ein meir levande klubb, seier klubbleiar Wetlesen.
– Vi får ein levande klubb. Vi får jo sterk konkurranse frå internett og det å spele heime. Med fleire folk blir det også eit betre miljø. Vi har også godt av å få større spreiing når det gjeld alder, kjønn og etnisitet, seier leiaren av sjakklubben.
Alle spelarane har fått medlemskap lokalt og i Noregs Sjakkforbund. Dermed kan dei spele turneringar over alt i landet og elles i verda. Ukrainarar er kjende for å vere gode i sjakk, så kanskje viser det seg å vere eit talent blant dei nye medlemene.
– Har du håp om at det kan dukke opp eit sjakktalent?
– Ja, det har ein alltids, seier Wetlesen med eit smil.