– Det krev veldig mykje jobb, og det er mange treningar med usemje, tårer og slit. Men vi kjem oss gjennom, det er mykje artig, seier Tommy Rykhus Johansen (14).
Det unge dansetalentet er éin av 13 Molde-dansarar som reiser til kystbyen Rimini Italia. Der er det EM frå 10. juli, og Molde er representerte med meir enn halvparten av dei 25 deltakarane.
Det er danseklubben Noise, som trinn for trinn har nærma seg noregstoppen, som leiar delegasjonen i hiphop-EM. Det krev mykje, meiner Rykhus Johansen.
– Det er mange timar hard jobbing, og så må ein villig til å gjere det. Ein kan ikkje berre trene for å trene, ein må gå inn for det, meiner 14-åringen.
– Ser fram til å lære
Merittlista til dei unge dansarane er allereie lang. Dei har toppa den norske rankinglista, tatt gull i NM og bidrege i LidoLido sin siste musikkvideo.
No i Italia skal Molde-dansarane delta i både grupper, duo og solo.
– Det eg ser mest fram til er nok å lære. Eg kjem til å lære mykje, trur Rykus Johansen – som skal delta solo.
Han gler seg òg til å bli kjent med eit internasjonalt dansemiljø.
Håper på avansement
14 år gamle Malene Johansen Lindseth skal delta i ein duo, og gler seg stort.
– Eigentleg har eg ingen forventningar fordi det er så høgt nivå, men eg vil jo kome vidare forbi første runde i alle fall, seier ho til NRK.
Éi av mødrene som skal med på turen, Sidsel Rykhus, har store forventningar til opphaldet.
– Det blir bra. Korleis resultatet blir får vi sjå, men vi håper sjølvsagt dei går vidare, seier Rykhus.