- Ho var ein tøff debattant og kjempa for verdiane sine

Det vart ein heilt spesiell start på skuleåret ved Volda vidaregåande skule i dag. Ein av elevane som skulle ha møtt klassekameratane sine var der ikkje. Guro Vardal Håvoll hadde gjennomført dei to første åra ved musikklina.

Rektor Trond Hjelseth opna skuleåret, ved å streke under at opninga skjedde med både djup sorg og glede.

– Det er både med stor glede og med stor sorg vi samlast i dag. Det er ei glede å treffe elevane, særleg dei som kjem her som førsteklassingar. Men vi møtes i stor sorg. Ein av dei som skulle ha møtt i dag er ikkje blant oss lenger, sa Trond Hjelseth.

• Les også: - Hun var engasjert og målbevisst
• Les også: Utøya-massakren har gitt en hel generasjon et spesielt engasjement

Volda vidaregåande skule har 500 elevar. Seks av elevane var på Utøya under massakren.

– Guro Vartdal Håvoll får ikkje gå saman med oss lenger. Guro sin død var ein tragedie i seg sjølv. Det som hende på Utøya er ein nasjonal tragedie. Det er vanskeleg å fatte det som har skjedd, sa Hjelseth.

Rektor Trond Hjelset skildra Guro Vartdal Håvoll som ein aktiv og engasjert elev.

– Ho handla i tråd med det ho tenkte. Ho slåst for verdiane ho hadde kjær. Ho var ein tøff debattant. No er det vår tur til å heidre Guro sitt minne, sa rektor Trond Hjelseth.

• Les også: - Vi får eit nærare omsorgsfellesskap
• Les også: Kjærlighetsbudskap skal trykkes på armbånd

Etter opninga hadde elevane og dei tilsette ved Volda vidaregåande skule eitt minutts stille. Dei tende lys for å markere minnet etter Guro Håvoll Vartdal. Fleire medelevar deltok i minnesamlinga med kulturinnslag.

– Guro likte å lese. Og ho leste mykje om Mahatma Gandhi. Ho brukte ofte eit sitat frå Ghandi, fortalde rektor Trond Hjelseth, og avslutta minnestunda med dette sitatet: – Ver den endringa du ønskjer å sjå i verda.