Det har vore knallhard konkurranse om å få bli med på kurset som denne veka blir arrangert på Setnesmoen i Rauma.
– Vi hadde femti søkarar. Berre femten kom inn. No er det full køyr med teori og praksis frå morgon til kveld.
Det seier Tore Paulsen, fagrådgjevar for ambulansetenesta i Helse Møre og Romsdal. Han håper at fleire får sjansen til å ta dette kurset etter kvart.
På Setnesmoen sit ambulansefolka og får teoriopplæring når NRK er innom. På kveldstid øver dei seg på praktiske ferdigheiter. Folk frå Rauma Røde Kors og Rauma vidaregåande skule er med som markørar.
Møre og Romsdal er først
– Erfaringane frå 22. juli viser at god leiing er viktig på ein skadestad. No er Møre og Romsdal først ut i landet med utdanning av innsatsleiarar for ambulansepersonell, fortel Tore Paulsen til NRK:
– Det er lange dagar og knallhardt arbeid. Folk blir slitne, men dei har pågangsmot, seier fagrådgjevaren.
– Desse få utvalde skal bli veldig gode. Dette vil vere med og løfte dei tenestene vi utfører.
Intens kursing
Per Johan Tøsse er ein av kursdeltakarane. Han er seksjonsleiar for ambulanse i Aukra og Fræna:
– Det er eit utruleg spennande kurs. Her er det intens opplæring frå morgon til kveld, seier han.
Han fortel at dei på kveldstid har øvd på mange forskjellige ting, som drukning, søk etter sakna personar og skarpe oppdrag.
– Men kan du ikkje det meste frå før, då?
– Eg har vore 23 år i tenesta. men her er det spissa mot det å vere leiar i vanskelege og krevjande situasjonar.
– Skjer når vi minst ventar det
– Har vi lært noko av 22. juli?
– Vi har lært at vi ikkje kan alt. Det er mykje vi ikkje er budde på. Det skjer når vi minst ventar det. Dermed gjeld det å ligge eit steg framfor i tankegangen, seier Per Johan Tøsse.