Mauseth ferdig som Tornekratt-leiar

«På bakgrunn av dei siste dagars hendingar, vel Eva-Brit Mauseth å trekkje seg frå sine styreverv i Tornekrattet med umiddelbar verknad. Eit samla styre stiller seg bak avgjersla.»

Det skriv Tornekrattet, Molde sin supporterklubb, på si eiga heimeside.

– Det finst ein fyllekøyrar i oss alle

Det var i eit intervju med NRK at stormen rundt Mauseth dei siste dagane byrja.

• LES OGSÅ: Kan feire seriegull med Molde i kveld - i morgen skal hun i fengsel

Etter gullfeiringa i 2011 blei Mauseth stoppa av politiet og seinare dømt til 21 dagars fengsel for fyllekøyring. Soninga i fengsel starta måndag, dagen etter Molde–Hønefoss.

Då NRK spurte om fengselsstraffa ville legge ein dempar på ei eventuell gullfeiring, svarte Mauseth:

– Å neida, feiring skal det bli! Dette har eg visst om lenge, og det er ikkje noko eg skjemmast over.

– Det finst ein fyllekøyrar i oss alle, sa Mauseth til NRK.no.

Ho uttalte òg at fengselsopphaldet ville bli som ein ferie. Dagen etterpå sa Mauseth til NRK at ho angra utsegnene.

• LES OGSÅ: Molde-supporterleder legger seg flat: – Jeg vil si unnskyld

Saka held fram under bildet.

Uheldige utsegner

Ny leiar i Tornekrattet er tidlegare nestleiar Oddmund Bjerkeset.

– Vi har hatt eit styremøte no i kveld, der vi diskuterte kva vi skal gjere med tanke på dei litt uheldige utsegnene som kom fram i media.

• LES OGSÅ: Supporterleder kjørte i gullrus
• LES OGSÅ: Tornekratt-leiar i fengsel

– Vi prata med ho Eva-Brit sjølv, og ho har valt å trekkje seg, meddeler Bjerkeset.

Ikkje i tråd med korleis Tornekrattet vil framstå

Ifølgje Bjerkeseth er det oppstyret i media, etter NRK si sak i forkant av Molde–Hønefoss søndag, som er hovudgrunnen.

– Ja, det er nok det. Vi i Tornekrattet synest ikkje utsegnene er heilt i tråd med korleis vi vil bli oppfatta som organisasjon, slår Bjerkeset fast.

– Molde Fotballklubb gjekk måndag ut og tok avstand får utsegnene. Var dette éin av grunnane til at Mauseth trakk seg?

– Det ønskjer eg ikkje å kommentere.

– Var det ho sjølv som trakk seg, eller var det press frå resten av styret?

– Det var ho Eva-Brit sjølv som trakk seg. Ho er no ute av styret og er vanleg medlem, fortel Bjerkeset til NRK.no.

Han er no leiar fram til Tornekrattet sitt årsmøte 19. januar.