Her skal Märtha Louise og Durek gifte seg

Laurdag 31. august blir det stor ståhei i turistbygda Geiranger. Det er kjent at bryllaupsfesten til prinsesse Märtha Louise og Durek Verrett skal vere på Hotell Union Geiranger.

I dokument frå politiet til NRK kjem det fram at vigselen skal skje på Vinjevollen. Dette er eit naturskjønt område på ein gard like ved hotellet.

TV 2 og NRK har fått løyve til å filme med drone, men det er visse unntak.

I vedtaket frå Møre og Romdal politidistrikt kjem det fram at det ikkje er lov å filme når hurtigbåten med gjestane kjem fredag, under vigselen på Vinjevollen laurdag og under transport av personell i samband med sikringstiltak.

Festen startar i Ålesund

Det er sokneprest Margit Lovise Holte som skal vie paret. Ho er ei venninne av prinsessa.

Bryllaupsfesten startar i Ålesund torsdag. På fredag skal gjestane dra med båt til Geiranger.

Den dagen ligg det eit stort cruiseskip, «Norwegian Prima», i bygda.

Skipet har rundt 2000 passasjerar om bord som kjem til å myldre i Geiranger og dra på utflukter samstundes som bryllaupsgjestane kjem.

• Trur bryllaupet blei lagt til Geiranger fordi ingen sladrar

Ukjent kven som kjem

Det er ikkje kjent kven som er gjestar i bryllaupet, men det er venta at det kjem både kongelege og kjendisar frå inn- og utland.

Møre og Romsdal politidistrikt har budd seg på bryllaupet i lang tid og har bedt om ekstra løyvingar frå Politidirektoratet.

Politiet skal sikre og beskytte arrangementet dersom gjestar har krav på vern.

– Det er så viktig for meg, alle menneska som er til stades og kva dei bringar inn i bryllaupet av energi og kjærleik, sa Märtha i ein podkast-episode av «HeartSmart Conversations» tidlegare i sommar.

Kongefamilien har vore på besøk i Geiranger mange gonger, både privat og offentleg. Kongeparet feira sølvbryllaupet sitt der i 1993.

Tidlegare i sommar var Märtha Louise og Durek Verrett på synfaring i Geiranger.