NRK Meny
Normal

Mann alvorleg skadd etter utforkøyring i Rauma

Ein mann blei floge til Molde sjukehus med alvorlege skader etter ei utforkøyring i Rauma kommune natt til søndag

Luftambulanse

Arkivfoto: Ein mann skal vere alvorleg skadd etter ei utforkøyring i Måndalen i Rauma kommune natt til søndag.

Foto: Åserud, Lise / SCANPIX

Det var like etter klokka halv eitt natt til søndag at politiet melde om ei utforkøyring ved Måndalen i Rauma.

Alle naudetatane rykte ut til staden, der dei fann ein bil med store skader.

– Etter nokre minutt fann dei føraren av bilen, ein mann, eit lite stykke frå bilen. Han var ikkje bevisst og luftambulansen blei tilkalla, seier Leif E. Bergem-Ohr, operasjonsleiar for politiet på Nordmøre og i Romsdal.

Alvorleg skadd

Mannen blei deretter floge til Molde sjukehus for vidare behandling.

– Han skal vere alvorleg skadd, seier operasjonsleiaren.

Ifølgje Helse Møre og Romsdal ligg mannen no på intensiv avdeling. Han skal vere alvorleg skadd, men er stabil.

Var aleine i bilen

Ifølgje operasjonsleiaren var det ingen andre bilar involvert i ulukka.

– Det er heller ingenting som tyder på at det var fleire personar i bilen som køyrde utfor vegen, seier Bergem-Ohr,

Det er så langt ukjent kva som er årsaka til utforkøyringa.

Saka blir no etterforska av politiet.