Det var like før klokka 18.00 at politiet fekk melding om at ein mann hadde gått seg fast på ca. 700 meter ved Middagsfjellet i Volda kommune.
Det var mannen sjølv som kontakta politiet for hjelp.
– Mannen var fjellvant, men hadde hamna på eit parti der det var så bratt at han ikkje greidde å ta seg vidare, verken opp eller ned, seier Per Åge Ferstad, operasjonsleiar ved Sunnmøre politidistrikt.
Henta i helikopter
Ein redningsaksjon vart sett i gang og hovudredningssentralen Sør-Norge sende eit Sea King-helikopter for å redde mannen ned frå fjellet.
– Forholda på staden var av ein slik karakter at mannen kunne heisast opp i helikopteret, fortel operasjonsleiar.
Like før klokka 19.00 var vedkomande trygt nede frå fjellet.
– Vi hadde kontakt med han heile tida, og han var uskadd og i fin form, seier Ferstad.
