Mange unge tenkjer nytt og kreativt

I ei tid med store omstillingar for næringar som er avhengige av oljeindustrien, gler Innovasjon Norge seg over at interessa for å tenke nytt blømer både i bedrifter og hos enkeltpersonar i fylket.

– Gründerånda lever svært godt i Møre og Romsdal, slår Steinar Johnsen, seniorrådgivar hos Innovasjon Norge fast.

Dei måler dagleg pulsen på næringslivet, og meiner det er svært viktig at det blir satsa på innovasjon og nyskaping i tider som dette.

Dei opplever dagleg at både permitterte arbeidarar frå ulike bedrifter og ungdom tek kontakt for å få både økonomisk støtte og rettleiing i korleis dei skal gå fram for å skape noko nytt.

I tillegg vender også etablerte bedrifter seg til kontoret fordi dei ønskjer hjelpt til å vri produksjonen over på nye produkt og drive innovasjon.

Honnør til dei unge

Johnsen er særleg imponert over at svært mange unge er interesserte i entreprenørskap. Han viser mellom anna til ungdomsbedrifta "Drømmebiten" i Kristiansund som har klekt ut ideen om å framstille eksklusiv sjokolade som dei kan selje lokalt. Sjokoladen prydar dei med figurar av kjende landemerke i byen. Akkurat slike unge vil Innovasjon Norge ha på banen.

– Ungdommen er dei vi må satse på i framtida, og det er gledeleg at så mange av dei engasjerer seg i å skape eigne bedrifter, seier seniorrådgivaren.

Han legg til at den landsomfattande ideelle organisasjonen "Ungt Entreprenørskap" er ein svært viktig aktør for å få unge til å satse. Også ordninga "Hopp i det" gjer det lettare å bli gründer i Møre og Romsdal. Denne ordninga står fylkeskommunen, Fylkesmannen og Innovasjon Norge bak.