NRK Meny
Normal

Mange kom for å sørge

Mellom 150 og 200 sørgande kom til Hareid kyrkje då kommunen opna dørene for folk som ville minnast Sami Milhem (20).

Minnestund på Hareid kyrkje etter drapet på Sami Milhem

Mange var samla i Hareid kyrkje søndag kveld for å minnest Sami Milhem (20).

Foto: NRK/Hans-Olav Rise/privat/montasje

Søndag kveld var Hareid kyrkje open for alle frå klokka 19 til 21 for alle som hadde behov for å snakke om det groteske drapet som skjedde i Hareid fredag.

– Det var eit sterkt behov for det. Det er mange ungdomsgruppe, venner og kjende av avdøde som hadde behov for å møtast og snakke med krise- og omsorgsgruppa, seier ordførar Anders Riise.

Ordføraren seier drapet på Sami Milhem, som budde i Hareid, har gått inn på det vesle lokalsamfunnet.

– Ei tragisk hending

Anders Riise

Ordførar i Hareid, Anders Riise, seier drapet på Sami Milhem har gått inn på innbyggjarane i kommunen.

Foto: Ivar Lid Riise / NRK

– Det er ei veldig tragisk hending. Det er spesielle omstende i denne drapssaka som gjer at behovet har vore ekstra stort, seier Riise.

Ordføraren fortel om ei kyrkje open for alle – der lys blei tent og lågmælte samtalar fann stad. Nærare 200 sørgande menneske kom og gjekk gjennom dei to timane kyrkjedørene stod opne i søndag kveld.

Vil vise medkjensle

Også familien til avdøde Sami Milhem (20) vart til stades i kyrkja.

– Dei sette pris på at vi arrangerte denne stunda og hadde behov for å møte både krisegruppa og vennene til Sami, seier Riise.

Ordføraren er glad for at familien tok turen til minnestunda.

– Det var fint at dei kom, slik at vi fekk vise dei medkjensle og at Hareid-samfunnet bryr seg om situasjonen.