I Trøndelag kjempar dei for å få eit nytt psykiatribygg ved St. Olavs Hospital, men under styremøtet til Helse Midt-Noreg i går vart det understreka at nytt sjukehus er første prioritet.
– Eg ser at media har sådd tivil om at det nye psykiatribygget ved St.Olavs Hospital i Trondheim vil verte prioritert framfor nytt fellessjukehus for Nordmøre og Romsdal, seier styremedlem i Helse Midt-Noreg, Eva Vinje Aurdal (Ap).
– Det har kanskje ført til at både tilsette i helseføretaket og folk flest har vorte litt i stuss på kva som vil skje vidare.
Fryktar at sjukehuset vert skvisa ut
Nytt sjukehus for Nordmøre og Romsdal står øvst på prioriteringslista til Helse Midt-Noreg, men fleire fryktar at eit nytt psykiatribygg ved St. Olavs Hospital vil rokkere på prioriteringa.
Fylkesordførar Jon Aasen (Ap), er blant dei som er redd det nye sjukehuset vil verte utsett.
– Vi kan ikkje kome i ein diskusjon om vi er tent med sjukehus framfor psykiatribygg eller ikke. Vi har ei prioriteringsliste og den må vi stå fast ved, seier Aasen.
Les også:
Dette tilbakeviste styreleiar i Helse Midt-Noreg, Marthe Styve Holte, under eit møte i Stjørdal i midten av februar.
– Nei, det vert inga endring i prioriteringa til Helse Midt-Noreg. Styret har allereie gjort vedtak om byggjestart av nytt fellessjukehus for Nordmøre og Romsdal. Men i tilleg skal styret ha ein prioriteringsdebatt på andre tiltak i høve til langtidsbudsjettet vårt som skal verte vedteke i juni 2013.
– Alle kan føle seg trygge på at sjukehuset kjem først
«Folkeaksjon ETT sykehus for Nordmøre og Romsdal» deler fylkesordførar Jon Aasen sin bekymring, og sendte i februar eit brev til helseminister Jonas Gahr Støre med krav om at staten må gripe inn og bestemme kvar og når det nye sjukehuset i Møre og Romsdal skal verte bygd.
Les også:
No ser Eva Vinje Aurdal igjen behov for å roe situasjonen.
– Styret har torsdag igjen stadfesta at det nye sjukehuset i Møre og Romsdal har førsteprioritet. Alle kan føle seg trygge på det.