Lokkar med gratisbillettar for å få fleire til å ta båten

Sundbåten har trufast tatt sine rundar mellom øyane i Kristiansund i år etter år, og er eit kjent og kjært syn i byen. Men ujamt passasjertal har i mange år vore ein trussel for båten. No blir det gratis på laurdagane framover, og håpet er at det skal trekkje nye kundar.

– Eg skulle gjerne tatt Sundbåten oftare, eg skal gjere det i sommar, då skal eg kjøpe meg klippekort, seier Hannelore Otwiaska, som til dagleg bur i Molde, men som fredag var i Kristiansund.

Vil ha folk til å droppe bilen

Det er nettopp slike kundar drivarane av Sundbåten ønskjer seg. Dei vil at folk skal parkere bilen, droppe å køyre bruene mellom øyane i Kristiansund, og heller hoppe på båten.

– All erfaring viser at når eit kollektivtransporttilbod blir billigare eller gratis, blir det ein passasjerauke. Eg trur også at det blir eit positivt tilskot for aktiviteten i sentrum, slik at folk som er i byen kjem nedom og tek ein rundtur, seier dagleg leiar i Sundbåtvesenet, Susanne Kirk Lossius.

Les også:

• Riksantikvaren verner sundbåten «Rapp»
• «Rapp» går sin siste tur

Håper framleis på gratis båt

Sundbåten blei starta av private allereie for snart 150 år sidan, men drifta blei etter kvart tatt over at kommunen. Mange har kjempa for at Sundbåten skulle bli gratis, men det ville kosta seks millionar kroner årleg, og det er førebels ikkje realistisk.

– Det var det vi lenge håpte på. Det gjekk ikkje i år på grunn av eit stramt budsjett, men vi håper vi skal få til noko neste år, seier leiaren i hovudutvalet for miljø og tekniske tenester i Kristiansund, Asle Andre Orseth (MDG).

Han trur at eit heilt gratis tilbod er det som skal til for å få folk til å bruke Sundbåten maksimalt.

Les også:

• Tidenes første kvinnelige sundbåtfører
• Bli med på operacruise