Morten Feiring, Gerd Vik Flø og Unni Takseth, alle busette i Ulstein kommune, møtest på fjellet Osberget rett ovanfor Osneset i Ulsteinvik. Dei kosar seg med kaffi og gjærbakst, og med seg i sekken denne gongen har dei diktboka "Tre" som nettopp har kome ut.
Boka inneheld fleire av dikta som desse tre har delt på sosiale media. I tillegg er boka krydra med naturbilda signert hobbyfotografane Stig Hole og Roar Hatløy.
Inspirert
Dei likar å kome seg ut i nærområdet. Turane dei kan ta er mange, og på desse turane får dei inspirasjon. Til å skrive dikt.
– Gjerne vert dikta delte allereie undervegs på turen via smarttelefonen, som regel på "fjesboka", seier Morten Feiring.
Han har alltid vore glad i ord og har stor glede av å dele dette med andre.
– Og responsen er stor, seier både Gerd Vik Flø og Unni Takseth. Begge opphavleg frå Vanylven, men busette i Ulsteinvik i mange år.
Frå vener og kjende på facebook har dei vorte oppmoda til å gje ut dikta i bokform, og no har dette skjedd via eit lokalt forlag.
Lokale poetar. Frå venstre Unni Takseth, Morten Feiring og Gerd Vik Flø.
Foto: Arne Flatin / NRK
