AaFK kan tape sin femte Eliteseriekamp på rad. Det er eventuelt første gong i historia. Sunnmøringane har allereie sett klubbrekord med 11 kampar utan siger i Eliteserien.
– Aalesund må vinne denne kampen for å halde plassen i Eliteserien, seier kommentator Rune Hustad.
Han peiker på at sunnmøringane har eit tøft kampprogram i sesongavslutninga.
KBK har ikkje imponert på bortebane. Dei har tapt 8 av 12 bortekampar denne sesongen, men oppgjeret mellom laga i Kristiansund i sommar enda uavgjort.
Hustad trur likevel at gevinsten ved siger er svært god motivasjon for nordmøringane.
– Reiser Kristiansund heim med tre poeng i dag, har dei så godt som berga plassen, seier Hustad.
- LES OGSÅ:
– Det kan også bli «første målet vinn», seier Hustad med eit lurt smil. Kristiansund har nemleg aldri tapt ein Eliteseriekamp dersom dei har scora først.
Stemning på stadion
Det er venta eit storinnrykk frå KBK-fansen. Supporterklubben Uglan har sett sitt preg på fleire bortekampar denne sesongen. Blant anna då dei fylte borteseksjonen på Lerkendal.
Supporterane var på plass fleire timar før avspark, for å lade opp til kampen i Ålesund sentrum.
Det er også venta mange besøkande til dagens kamp i Ålesund. Klubben opplyste at dei har selt billettar til 7000 plassar før kampen.