Tysdag spelte tremannsgruppa «Folk for Forest» frå Kristiansund live hos NRK i Ålesund. Gruppa bydde på eit spennande sett med songar om alt frå å bevare skog og redde orangutangar, til ein song om Frank som er død.
– Men det gjer ingenting for han var ein drittsekk, seier vokalist Helle Fladset Karsdottir.
Svaret på kvifor han var ein drittsekk forklarar ho i songen. I tillegg hadde sjølvsagt bandet også ein obligatorisk song om kjærleik.
– Denne handlar om at den store kjærleiken døyr, og at eg drikk meg ihjel, seier vokalist Helle Fladset Karsdottir.
Først rockestjerne, så lærar
Dei to damene i gruppa, Andrea Vik Andersdatter og Helle Fladset Karsdottir, har spelt i lag i 10 år, men det var først i januar i fjor gruppa «Folk for Forest» blei til. Då fann damene ut at dei trengde ein bassist og fekk Stian Aune med på laget.
Karsdottir bur i Bergen, men alle tre er frå Kristiansund. Andersdatter jobbar til dagleg som lærar på ein barneskule.
– Men elevane veit at eg hovudsakleg er rockestjerne, og så lærar som nummer to, seier ho lurt.
Også Karsdottir har planar om å bli lærar. Ho går på lærarhøgskulen i Bergen, medan Aune er lydmann.
– Det er med andre ord ikkje så ofte eg står på scena, eg er mest ved sida av, seier han.
– Folkeleg speleglede
Det er Karsdottir som skriv tekstane og melodiane, medan Andersdatter og Aune er med på å arrangere musikken på øvingane.
– Eg vil vel kalle musikken folkeleg, seier ho.
Karsdottir får inspirasjon frå fjell og sjø. Derfor tok dei også namnet «Folk for Forest.»
– Og livet generelt sjølvsagt, seier ho.
– Ein dose galskap
Pål Kristian Lindseth i NRK Møre og Romsdal seier det var lett å velje Kristiansund-gruppa til lunsjkonsert.
– Dette bandet fall vi for med ein gong. Her er det speleglede, ein dose galskap – og engasjement. Dette er ikkje A4, men alt treng heller ikkje å vere det, seier Lindseth.
Sjekk dei ut: Her finn du Folk for Forest på Soundcloud, NRK Urørt og Facebook.
Rockestjernedraumen er ikkje død
– Det er litt skummelt å spele live, men det skjerpar berre, seier Andersdatter.
Opptreden hos NRK gjer at dei er eit steg nærare rockestjernedraumen.
– Håpet lever vel enno, smiler ho.
I morgon skal dei i studio og spele inn litt av musikken sin, og kanskje skal vi få sjå meir av Kristiansund-bandet i tida framover.