Befolkninga i Noreg har fått prenta inn at vi skal halde oss heime ved det minste snufs eller vondt i halsen.
– Eg må ha legeerklæring for å vere borte frå skulen berre for å vere forkjølt og snufse litt, sukkar Madelen Valbø Enoksen (18) på Ålesund vidaregåande skole.
Fråversreglane skaper frustrasjon både hos elevar og legar, som opplever eit rush av snufsete elevar på legekontoret.
No varslar den nye kunnskapsministeren, Tonje Brenna (Ap), at ho vil gjere reglane mindre rigide og byråkratiske.
– Regjeringa sitt mål er at elevane skal vere mest mogleg på skulen. Det er uheldig at fastlegar si knappe tid blir tatt opp av forkjølte elevar. Derfor vil eg sjå på moglegheita for å forme fråværsreglane på ein betre måte.
Eksplosjon av sjuke
Fråversgrensa blei innført igjen sist veke, og Kremmergården legesenter i Ålesund har dei siste dagane har dei blitt kontakta av mange ungdomar.
Frå før av var det alt hektiske dagar på legekontoret. Kontorsjef Ingunn Myklebust seier telefonen ringer i eitt sett.
– Etter at samfunnet opna opp igjen har det eksplodert med smitte av luftvegsinfeksjonar. Vi klarer nesten ikkje ta unna, seier Myklebust.
– Unødvendig ressursbruk
Også i Kristiansund merkar legane at det har auka med førespurnader dei siste dagane.
– Det blir relativt mange unødvendige konsultasjonar som fastlegen heller kunne brukt til meir fornuftige ting, seier kommuneoverlege Askill Sandvik.
Han meiner styresmaktene burde ha venta med å innføre fråværsgrensa til etter jul. I haust florerer det med forkjøling og luftvegsinfeksjonar. I tillegg er influensa venta å kome snart.
Ekstra stress
Elevorganisasjonen meiner det hastar for den nye kunnskapsministeren å endre reglane.
– Vi har valet mellom å overbelaste fastlegane eller å gå på skulen sjuke for å få karakter i faga, seier leiar i Elevorganisasjonen, Edvard Botterli Udnæs.
Ved skulen i Ålesund håper også Madelen Valbø Enoksen og venninna Sofie Solheim at reglane blir endra raskt.
– For oss som går sisteåret har fråværet mykje å seie for vitnemålet vårt. Det kan ende med at du kjem på skulen sjølv om du er sjuk, seier Solheim.