– Vi skriv ut for mykje, og må ta vår del av ansvaret, seier lege, Petter Brelin.
Brelin er praktiserande fastlege og leiar i Norsk Forening for Allmennmedisin.
Han er ein av dei som meiner legar skriv ut for mykje B-preparat. Sterke, vanedannande medikament som sovemedisin, beroligende og angstdempande medisin.
Medikamenta er til god hjelp for mange pasientar i ein vanskeleg situasjon, men sidan dei er så vanedannande kan dei fort bli eit problem.
– Vi bør berre skrive det ut når det er høgst nødvending. Altså når pasienten er i krise eller har det særleg vanskeleg, utdjupar han.
Likevel blir det skrive ut mykje B-preparat i Norge. Ikkje noko meir enn for 10 år sidan, men heller ikkje nemneverdig mindre. Fleire meiner det er ein uting.
Fungerer som alkohol
– Her på klinikken ser vi dagleg folk som må på avvenning for B-preparat, seier Egil Schistad.
– Folk trur kanskje at det ikkje er farleg eller at ein ikkje kan bli avhengig, berre fordi det er ein tablett, seier han.
Men det stemmer ikkje. Schistad forklarer at mange av desse medikamenta fungerer på kroppen på same måte som alkohol eller heroin. Dei er sterke og lett å bli avhengig av.
– Sjølv om det er velmeint, kan legen gjere pasienten ein bjørneteneste ved at pasienten får avheng som eit tilleggsproblem.
Ber styresmaktene om hjelp
– Vi har hatt mange forsøk på å redusere bruken av B-preparat. Statistikken viser at vi ikkje skriv ut særleg meir enn for 10 år sidan, men vi burde likevel redusere bruken, seier Brelin.
Brelin seier at legar ofte har problem med å overtyde pasientar om at B-preparat ikkje er hensiktsmessig, og ønsker seg hjelp frå styresmaktene.
– Vi har gode erfaringar med kampanjen rundt antibiotika, der styresmaktene har vore med å forklare kvifor det er viktig at vi ikkje bruker for mykje.
– Kanskje vi kunne fått god effekt av ei slik kampanje for B-preparat, seier Brelin spørjande.
Vurder nasjonal kampanje
Helsedirektoratet er kjent med utfordringa, og seier dei får førespurnader om B-preparat.
– Vi får tilbakemelding om at det er eit problem for forholdsvis mange pasientar, seier Per Magne Mikaelsen i Helsedirektoratet.
Mikaelsen forklarer at direktoratet har gitt ut ei nasjonal rettleiing til legane, og at dei legg ganske strenge føringar for korleis legane skal handtere B-preparat.
– Vi har gjort ei nasjonal undersøking som viser at befolkninga har god kunnskap om vanedannande medikament. Direktoratet deler også informasjon om temaet på si eiga nettside, Helsenorge.no.
– Det kan godt hende at direktoratet burde gjort meir. Vi vurderer det heile tida, men enn så lenge har ikkje vi fått noko oppdrag om å gjere det, seier han.