Det blei oppretta 170 færre nye lærlingplassar det siste året enn tidlegare. Inger Anita Sjømæling, seksjonsleiar i fylkeskommunen, fryktar at det kan blir det tøffare å få bedriftene til å halde oppe dette samfunnsansvaret framover.
– Som følgje av nedgangstidene innanfor industrien ser vi at vi har problem med å skaffe nok lærlingplassar til årets lærlingar, seier ho.
Lærlingordningar har tradisjonelt fungert svært bra i Møre og Romsdal, men oppdragstørken innanfor industri og næringsliv rammar også dei unge lærlingane.
– Det er rett og slett mangel på arbeid i dei store næringane som verft- og oljeindustrien. Mange bedrifter er prega av permitteringar og oppseiingar, og då vegrar dei seg for å ta inn lærlingar, seier Sjømæling.
Viktig å ta vare på lærlingordninga
Kleive Betongbygg i Molde har hatt ein lang tradisjon med å satse på lærlingar, også i tunge tider.
– Det betyr alt for bedrifta å kunne lære opp folk sjølv. Det er ein del av den langsiktige filosofien om å lære opp folk heile tida. Dei tilsette blir pensjonerte etter kvart, og då må vi ha nye folk å erstatte dei med, seier Odd Kåre Amundsgård, dagleg leiar i Kleive Betongbygg. Han er også NHO sin representant i yrkesopplæringsnemnda.
– Det er viktig å ikkje la det stoppe opp og sørge for at ikkje nokon grupper fell utanfor, seier han.
Martin Hagen er lærling og har snart fagbrevet i boks etter fullført løp ved Kleive Betongbygg. Han er svært fornøgd med lærlingordninga.
– Det har vore ei veldig god utdanning. Eg får prøvd mange forskjellige arbeidsoppgåver og har fått god oppfølging, så no gler eg meg til å ta fagbrevet, seier han.
- Les også:
Må tenke kreativt
Arbeidarpartipolitikar Hanne Notøy har sjølv vore lærling og brenn spesielt for lærlingordninga. Ho enda sjølv opp med fast jobb i Ulstein elektro etter fullført lærlingtid. Ho er uroa for at entusiasmen for å ta inn ny lærlingar ikkje er like stor som den har vore.
– Delar av næringslivet i Møre og Romsdal er no nede i ein bølgedal, men vi må ikkje gi opp for det. Vi må tenke kreativt og jobbe for at desse ungdomane skal få oppfylt draumen sin om å stå med eit fagbrev i handa, seier Notøy.
– Som politikar har eg eit ansvar for å vere med på å tenke desse kreative tankane. Samtidig håpar eg at mange næringslivsleiarar ser kor kviting det er å ta på seg samfunnsoppdraget med å hjelpe til å utdanne desse ungdomane, held ho fram.
Ho får støtte av Inger Anita Sjømæling.
– Kommunane kan bli betre. Og kanskje må ein særleg appellere til kommunane no når det er nedgang i andre fag, slik at dei tek eit større ansvar for å få lærlingar inn i kommunen, seier ho.
- Les også: