– Ikkje alle born i andre land har det like godt som oss, seier venninnene Malene Sulen (10) og Sofie Kolås (8).
Dei er to av mange born som under den årlege julegrantenninga i Sykkylven la frå seg gåver under treet.
Send bilete av julegrantenninga der du er til mr@nrk.no
– Det er betre dei får julegåvene
Fleire hadde møtt opp for å vere med på julegrantenninga i Sykkylven sentrum laurdag.
Foto: Jannicke Farstad / NRK
Julegrana var fint pynta med personlege helsingar frå borna.
Foto: Jannicke Farstad / NRK
Alle gåvene under treet vert sende av garde med lastebil til born som treng dei meir.
Foto: Jannicke Farstad / NRKAlle gåvene som borna leverte inn under julegrantenninga i Sykkylven, skal snart verte sende til Baltikum.
– Det er betre at dei får julegåvene i staden for oss, er Malene og Sofie einige om.
Gåvene skal nemleg glede andre born. Dei vert sende til barneheimar i Baltikum.
– I Baltikum er det mange barneheimar med born som ikkje har like mykje som våre born har, fortel Geir Kvalvåg i organisasjonen Lions i Sykkylven.
– Det er kjekt at vi kan bidra med å samle inn og sende brukte leiker, brukte klede, nye ting og ting borna her har laga sjølve.
– Gjevargleda er veldig stor
Ein av dei som er i det gåvmilde hjørnet, er Elias Fauske (7).
– Eg har gitt ein sykkel, ei hoppeleike og lego, fortel han.
Dei gåvene skal inn i ein lastebil og køyrast nedover til barneheimane i Baltikum.
– Når bilen med julegåver kjem er det veldig stor glede for då veit dei at dei får det dei treng, fortel Sølvi Skynstad i «Baltikumhjelpen».
I tillegg til Sykkylven samlar organisasjonen inn julegåver frå fleire stader på Sunnmøre. Etter jul køyrer «Baltikumhjelpen» av garde med ein lastebil med 700-800 gåver.
– Gjevargleda er veldig stor. Vi er veldig takknemlege, seier Skynstad.
