Berga livet til kval i naud

I 11.30-tida tysdag greidde akvaristar frå Atlanterhavsparken i Ålesund å fjerne posen frå hovudet til kvalen som svømte rundt i Nørvasundet.

Akvaristar frå Atlanterhavsparken brukte mellom anna eit not til å ringe inne kvalen.

Akvarist og dykkar Finn Refsnes frå Atlanterhavsparken kom dermed nær nok til å fjerne den plagsame plastposen frå hovudet til kvalen.

Stort samarbeid

Det var like etter klokka 09.00 tysdag morgon at Ålesund brannvesen melde at dei var ute for å assistere ein kval i naud saman med akvaristar frå Atlanterhavsparken i Ålesund.

Den om lag 2–3 meter lange kvalen hadde fått ein pose over hovudet og svømte rundt i området mellom Fredsberg og båthamna i Gåseidvika i Ålesund. Brannvesenet og akvaristane køyrde ut i båt for å prøve å hjelpe den vesle kvalen, men det var lettare sagt enn gjort.

– Vi hadde ikkje sjanse. Vi kom nær den, men det var umogleg å fjerne posen. Den vart berre villare og villare dess nærare vi kom, seier Jan Ove Stette i Ålesund brannvesen til NRK i titida.

• Les også: Kvalane viste seg fram for folket

Kvalen blir stressa

Ifølgje Tommy Vangsmo, akvarist ved Atlanterhavsparken i Ålesund, har kvalen truleg svømt rundt i Nørvasundet i nokre dagar.

– Posen er tredd over hovudet på kvalen og ligg delvis inne i munnen og over auga til kvalen. Den er nok rimeleg forvirra ettersom den ikkje ser noko, seier han.

Luftholet til kvalen er opent så den skal ikkje ha problem med å puste, men Vangsmo frykta for konsekvensane dersom dei ikkje fekk fjerna posen.

– Vi skal no sette oss ned for å prøve å finne ei løysing på dette. Eg trur situasjonen er svært stressande for kvalen, og eg fryktar at den kjem til å slite seg ut og døy dersom vi ikkje får fjerna posen, sa han.

• Les også: Knølkvalen kom heilt opp i fjøresteinane

Vil prøve å kome nær kvalen

Svein Wollstad i Ålesund dykkarservice fortel at dei fekk vite om kvalen i går og at dei no vil prøve ein ny strategi for å hjelpe kvalen.

– Vi kjem til å ligge ute i vatnet og prøve å kome oss nær kvalen slik at vi får fjerna posen, seier han.

Wollstad trur kvalen berre blir meir stressa av båtane som køyrer rundt han.

– Håpet er at han etter kvart blir fortruleg med oss slik at den kjem nærmare, men det kan fort bli krevjande dersom vi må svømme etter kvalen, seier han.

• Les også: - Ville gjort det igjen