Det er ikkje så mange Leicester-fans her i landet. Men Frode Mauren har heia på laget sidan 1972. Då Leicester-fansen i England jubla for seriegullet i går, sat 51-åringen mutters åleine på Valderøya på Sunnmøre.
– Det er ganske einsamt å heie på Leicester, seier 51-åringen flirande: – Nei, no er det heilt utruleg kjekt!
Så seint som 24.april var han på King Power Stadium. Laget hans slo Swansea 4-0. Då skjønte han det gjekk rette vegen.
- Den stemninga som var der i 93 minutt, har eg aldri før opplevd på eit fotballstadion.
Naustet på Valderøya er ein fin plass å vere når Leicester spelar kampar. Ingen andre har interesse av å vere med.
Foto: Remi Sagen / NRKSom einsam Leicester-supporter, drar han ofte åleine til naustet sitt ved fjorden på Valderøya når favorittlaget spelar.
Liverpool-fansen uffar seg
- Liverpool-fansen i nabonaustet uffar seg over måla som rullar inn. Eg sit og nyt Leicester-suksessen med eit glas vin.
Det kan vere mange grunnar til å ha eit favorittlag. Men bakgrunnen for Frode Mauren sitt val i barndommen, er nok blant dei mest originale.
- Eg bladde i ei fotballbok med alfabetisk liste over alle lag. Mange heldt med Leeds den tida. Dermed valde eg laget på neste side, og det var Leicester. Sidan har det vore berre ein klubb for meg, seier Frode Mauren.
Leicester-supporteren såg laget sitt så seint som 24.april, då dei slo Swansea 4-0.
Foto: Remi Sagen / NRK
Jubelsesongen er ikkje over. No planlegg han ein durabeleg fotballfest i naustet når serievinnaren møter Chelsea i den siste kampen.
- Eg blir ganske sikkert einaste Leicester-suportaren på festen. Men eg trur Liverpool- og United-fansen unnar oss dette gullet.
