Mektige rumper skal kvile på norsk stoff

– Vi er jo litt stolte, det er eit prestisjefullt oppdrag dette her.

Bedrifta på Nordmøre har sikra seg ei ny kontrakt med FN, som pussar opp eitt av sine aller viktigaste rom.

– Vi har fått i oppdrag å lage møbelstoff som skal til FN sitt tryggingsråd. Og der er det mange store personlegdommar som sit og tek store avgjerder, fortel dagleg leiar Maria Aasprang.

Norsk kunst og design

Det høyrest kanskje tilfeldig ut, at veveriet på Tingvoll skal veve stoffet som medlema i tryggingsrådet skal sitte på. Men dette er ein del av ein lengre tradisjon.

Det var Noreg som fekk i oppdrag å utforme rommet i 1952. Den norske arkitekten Arnstein Arneberg stod for utforminga, og kunstnar Per Krohg har laga det store veggmåleriet.

No skal FN altså ha nye setestoff i lin. Og veveriet på Tingvoll er det einaste industrielle linveveriet i Noreg.

Så det er berre de som kunne levert dette?

– Ja, det er det nok, seier styreleiar Viktor Gautvik.

Det er heller ikkje første gong veveriet på Nordmøre har fått oppdrag frå FN. For 11 år sidan var dei i gang med å veve gardiner og tapetar til det same rommet.

Viktig for norsk design i utlandet

Tone Rasch er koservator ved teknisk museum i Oslo. Ho fortel at tekstilindustrien ein gong i tida var stor i Noreg.

– Det at FN skulle ha tekstilar frå Noreg betyr jo at Noreg hadde ein tekstilindustri som kunne ivareta eit slikt oppdrag på ein bra måte, seier Rasch.

Sidan 70-talet er det meste av norsk tekstilindustri lagt ned, fortel konservatoren. Men framleis er det nokre som held det gåande.

– Det at norsk industri framleis kan ta på seg eit sånt type oppdrag er kjempefint, og viktig for profileringa av norsk design i utlandet.