Levande lys forma til bokstavane i "Frankrike" er stilt opp ved Piren i Kristiansund laurdag ettermiddag. I løpet av dagen har mange vore bortom med blomster, for å markere avsky mot terroråtaka i Paris fredag kveld.
Ei av dei er Lill Fjerstad (45) og dottera Lone (5).
- Eg syns det som har skjedd i Paris er heilt forferdeleg, det er heilt uverkeleg. Og så fryktar eg at det skal skje i andre land også, at det er ei bølgje, seier ho.
– Er du uroleg for at det skal skje i Noreg?
– Ja, det er eg. Kanskje ikkje i Kristiansund, men i Oslo, at dei tek dei store byane, seier ho.
Les også:
Vil hjelpe – men ikkje alle
Småbarnsmora meiner det er rett å hjelpe flyktningane som kjem til Europa no. Trass i at det nettopp er IS mange flyktar frå no, fryktar ho at enkelte av dei som kjem sympatiserer med IS likevel.
– Det er jo ein slik straum, det er nok også IS-sympatisørar blant dei som kjem, seier ho.
– Trur du at andre nordmenn fryktar dei som kjem?
– Både og. Eg er tilhengjar av å hjelpe dei som treng det, men det er ikkje alle som treng hjelp, seier ho.
Oppmodar folk om å be
Israelske Betty Rosenberg la ned blomster på Piren laurdag ettermiddag. Ho meiner folk no bør be.
Foto: Roar StrømIsraelske Betty Rosenberg, som no bur i Kristiansund, var også på Piren laurdag ettermiddag. Ho vakna opp laurdag morgon og blei overvelda over alle som skreiv om terroråtaka på Facebook, Twitter og Instagram. Mange brukar emneknaggen "PrayforParis".
– Eg tenkjer at folk verkeleg bør be for Paris no. Kjøp eit lys og litt blomster og be! oppmodar ho folk. Sjølv hadde ho med roser laurdag ettermiddag.
– Eg er veldig lei meg, det er forferdeleg, seier ho.
