– Den nye rådmannen er veldig opptatt av at me skal halde trykket på bystyret sitt vedtak, seier kommunalsjef Karl Kjetil Skuseth i Kristiansund.
– Det er viktig for oss å vise fram for medarbeidarar, politikarar, og innbyggarar, kvar me til ei kvar tid er i forhold til den vedtatte planen. Me trur det er med på å motivere organisasjonen til å vise at dette skal me klare, seier han.
Vil ut av Robek i 2016
Etter to år med underskot vart det tidlegare i år klart at Kristiansund kommune må kutte over 70 millionar kroner for å få kontroll på økonomien.
Kommunen ynskjer å komme seg ut av Robek-lista, og målet er å klare det allereie i 2016. Økonomistyringa er dei opne om på nettsidene sine.
– Me trur me ligg godt an, men når me set opp ein slik plan er det klart at det er dei første millionane det er lettast å spare inn, seier Skuseth.
– Me må nok slite litt hardare med å hente inn resten, seier han.
Positivt å vera open
Fagkoordinator for kommuneøkonomi ved fylkesmannen i Møre og Romsdal, Martin Gjendem Mortensen, meiner det er positivt at Kristiansund kommune er open om økonomien.
– Kommunen legg då til rette for informasjon til innbyggarane, seier han.
– Det kan tene som grunnlag for debatt og diskusjon om den riktige utviklinga i Kristiansund kommune, når det gjeld tenesteproduksjon og tenester til innbyggjarane, seier Mortensen.