Kripos finn ikkje haldepunkt for at det har skjedd ei straffbar handling i Maja Herner-saka

Hopp til innhold

Etterforskarar i Kripos har sidan september lese gjennom alle dokument i forsvinningssaka i Ørsta.

– Dei finn heller ikkje haldepunkt for at det har vore ei straffbar handling, seier politiadvokat Yngve Skovly.

Han og andre representantar frå Møre og Romsdal politidistrikt er torsdag i møte med Kripos der dei får presentert funna i rapporten.

– Dei meiner at det har blitt gjort ei god og brei etterforsking, seier Skovly.

Maja (25) har vore sakna i eitt år: Ny leiting fredag

Trur ho har forulykka i fjellet

Etter at Maja Herner ikkje møtte opp på jobb som avtalt i november i fjor, har politi, frivillige og leitemannskap frå Røde Kors fleire gonger søkt etter henne i fjella i Ørsta.

Politiet har også gått gjennom fleire tusen bilde som har blitt tatt av området.

Den polske kvinna, som nyleg hadde flytta til bygda, skulle etter planen gå ein kort tur i retning fjellet Saudehornet. Sidan har ingen sett henne.

Bilen til Herner blei funnen parkert ved ein populær turveg der ein kan gå vidare til fjellet Saudehornet. I tillegg har politiet funne ut at den eine telefonen til 25-åringen har vore i dekningsområde til fjellpartiet.

Det har florert fleire teoriar om kva som kan ha skjedd med den sakna kvinna. Nokre av vennane til Herner starta ein innsamlingsaksjon for å engasjere ein privatdetektiv. Men heller ikkje det har gitt resultat. Politiet har i løpet av etterforskinga ikkje funne noko som indikerer at det kan ha skjedd noko kriminelt, og dei har difor jobba utifrå ein teori om at kvinna har forulykka i fjellet.

– Kripos meiner det har vore riktig å prioritere den hypotesen, seier Skovly etter å ha fått presentert hovudkonklusjonen frå rapporten.

Førre veke blei det sett i gang nye søk etter Herner i Ørsta. Dette skjedde etter tips om mykje ramneaktivitet i eit området som det hadde blitt søkt lite i tidlegare. Men heller ikkje dette søket gav resultat.

Skal prøve å kartlegge bevegelsane meir nøyaktig

Politiet skal no ta med seg tilbakemeldingane frå Kripos og vurdere det opp imot den vidare etterforskinga. Dei har heilt konkret fått anbefalingar om å ta enkelte nye avhøyr.

– Det er for å prøve å kartlegge bevegelsane meir nøyaktig slik at vi eventuelt kan gjere eit nytt og meir spissa forsøk på å finne henne, seier Skovly.

Mysteriet Maja Herner

21. november etter kl. 13.00
Sender meldingar
Maja Herner sender meldingar til fleire kjenningar om at ho har tenkt seg ein tur «up to the mountains».
21. november 2018 ca. kl. 12.35
På butikken
Maja Herner blir observert på ein daglegvarebutikk i Ørsta. Ho kjøper vanlege varer som ho sannsynlegvis tek med seg til bustaden sin i Ørsta.
21. november ca. kl. 14.30
Starta turen
Maja Herner skal ha starta på turen sin. Ho parkerer bilen sin ved ein populær turveg i Vikegeila i Ørsta. Frå denne vegen kan ein kome seg til det 1303 meter høge Saudehornet.
21. november kl. 18.30
Leiteaksjon
Det blir sett i gang ein leiteaksjon etter Maja Herner. Røde Kors og ein luftambulanse deltek.
21. november kl. 21.30
Utvidar leiteaksjonen
Leiteaksjonen blir utvida, mellom anna med redningshelikopter frå Florø.
22. november
Leitinga held fram
Mange frivillige har meldt seg og deltek i søket. Politiet opplyser kl. 13.30 at dei ikkje har nokon spor og at dei gjerne vil ha tips i saka.
23. november
Endå fleire deltek
Også elevar frå folkehøgskulen i bygda deltek no i søket, saman med fleire hundre andre frivillige. Det blir mellom anna leita i hagar i Ørsta ikkje langt frå der Maja Herner skal ha starta turen sin.
24. november, om ettermiddagen
Sperra av området
Politiet sperra av eit området der det skal ha blitt funne interessante gjenstandar. Men politiet seier at funna ikkje treng om å ha noko med den sakna kvinna å gjere.
25. november ca. kl. 14.00
Tek bilete frå helikopter
Eit politihelikopter frå Oslo bidreg med å ta foto av fjellområdet.
25. november, ca. 17.30
Avsluttar aksjonen
Politiet melder at redningsaksjonen er avslutta. Dei trur ikkje lenger det er håp om å finne Maja Herner i live.
26. november
Går gjennom bileta
Politiet opplyser at det er tatt om lag 2800 bilete frå fjellområdet som dei skal gå gjennom.
28. november
Leitar igjen
Politiet opplyser at leitinga i fjellområdet held fram. Mellom anna bidreg hundar i søka.
29. november
Drone
Det blir sett i gang søk med drone. Om ettermiddagen opplyser politiet at dronesøka ikkje gav resultat.
3. desember
Open for alle teoriar
Politiadvokat og etterforskingsleiar Inger Myklebust Ferstad seier til NRK at dei må halde alle teoriar opne, sjølv om dei ikkje har haldepunkt for at det har skjedd noko straffbart. Same dag kjem det fram at vennar av Maja Herner har starta ein innsamlingsaksjon for å sende polske privatetterforskarar til Ørsta.
5. desember
Rykte og spekulasjonar
Ørsta-ordførar Stein Aam stadfestar at det går mange rykte i bygda om kva som kan ha skjedd med Maja Herner. – Saka heng tungt over oss i bygda og over meg som ordførar, seier Aam til NRK.
6. desember
Usikkert kor høgt i fjellet
Inger Myklebust Ferstad opplyser til NRK at dei ikkje kan seie nøyaktig kor høgt i fjellet Maja Herner kan ha vore. – Dette er ikkje eksakt vitskap. Indikasjonane via basestasjonane viser at telefonen har vore oppe i høgda, men vi veit ikkje kor mange høgdemeter det er snakk om, seier politiadvokat Inger Myklebust Ferstad.
12. desember
Veret hindrar nye søk
Politiet ønskjer å gjere nye søk i fjellområdet, men dårleg ver hindrar nye søk. Det er kaldt i Ørsta og mykje snø i fjellet.
28. desember
Polsk detektivbyrå
NRK skriv at eit polsk detektivbyrå har lansert andre teoriar om kva som kan ha skjedd med Maja Herner. Detektivbyrået samarbeider ikkje med politiet i Norge.
Nyttårshelga 2019
Nytt søk
Etter tips frå publikum om observasjon av ramn gjer politiet eit nytt søk 300-400 meter over havet. Søket blir utan resultat.
8. januar
Ber om observasjonar
Politiet ber publikum melde inn observasjon av ørn og ramn nær bakken i det aktuelle fjellområdet i Ørsta.
10. januar
Nye søk
To spesialtrena hundreekvipasjar frå Møre og Romsdal politidistrikt gjorde søk i terrenget. Dei gjorde ingen funn av interesse.
21. januar
Redde for å gå tur
Fleire sentrale personar i Ørsta-samfunnet seier at turgåinga i området der Maja Herner skal ha forsvunne har gått drastisk ned dei to siste månadane. Mange er redde grunna den uavklara situasjonen.
18. februar
Stillstand
Politiet opplyser at det ikkje er gjennomført nye søk i terrenget sidan 10. januar.
24. mai
Har lagt planen
Politiet melder at dei har blinka ut konkrete stader dei skal leite etter Maja Herner i sommar. – Det er seks til sju stader vi er nøydde til å få undersøkt i løpet av sommaren. Vi er avhengige av hjelp fra alpine redningsgrupper og vi må vente til snøen har forsvunne. Dette er stader som er vanskelege å kome seg til og vi har ikkje vore er tidlegere, seier politiinspektør Yngve Skovly.
16. juli
Ventar framleis
Mykje snø seint på året har gjort at leitingsarbeidet etter Maja Herner framleis står på vent. – Vi ventar på at snøforholda skal bli identiske slik dei var då ho forsvann. Framleis ligg det for mykje snø i fjellet. Men planane for leitearbeidet er klare. Så vi går opp så fort forholda er gode nok, seier etterforskingsleiar Grete Hjelle til NRK.
15. august
Starta søk med drone
Politiet starta å søke i fjellet med drone. Det er utfordrane arbeid, og ein er avhengig av godt ver for å få noko ut av bilda.
22. september
Nye helikoptersøk
Politiet gjennomførte nye helikoptersøk i området rundt Saudehornet i Ørsta. Samtidig tok dei bilde av område dei ønska å sjå nærare på.
26.september
Får hjelp av Kripos
Politiet i Møre og Romsdal opplyser at dei får hjelp av Kripos. Cold Case-gruppa skal no sjå gjennom alt etterforskingsmaterialet for å sjå om det er fleire etterforskingsskritt som bør bli gjennomført.
21. november 2019
Sakna i eitt år
Maja Herner har vore sakna i eitt år.
22. november
Nytt søk
Røde Kors gjennomfører nye søk etter Maja Herner i Ørsta. Nye tips om mykje ramneaktivitet i eit område, der det har vore leita lite før, gjer at det blir sett i gang nye søk.