Bygget brann ned til grunnen, og måndag opplyser innsatsleiar Kjersti Vestavik til NRK at det framleis er for varmt i branntomta til at mannskap kan gå inn i den.
Politiet skal no starte avhøyr av folk i området som kan ha opplysingar om kva som kan ha skjedd. Vestavik seier at politiet i samråd med brannvesenet etter kvart må vurdere når det blir mogeleg også med undersøkingar inne i branntomta.
– Kriminalteknikarar skal inn på branntomta når den er heilt avkjølt, seier ho.
Måtte evakuere folk i nærområdet
Natt til måndag jobba brannmannskap med ettersløkking.
I fleire timar sette brannvesenet ei sikkerheitssone på 1000 meter frå brannen. På det meste var rundt 20 husstandar evakuert. Sikkerheitssona blei natt til måndag redusert til 300 meter.
Det skal mellom anna ha vorte lagra fleire bubilar, campingvogner og flasker med propan- og acetylengass der. Utover natta og morgontimane dreiv dei framleis med nedkjøling av gassflaskene.
– Utfordringa var å få påført nok vatn på brannstaden. Løysinga vart å etablere ei pumpe i Oselva, også måtte tankbilar køyre skytteltrafikk gjennom natta, seier Steinar Flusund i brannvesenet.
Låven ligg i Osen, inst i Fannefjorden, i Molde kommune.
Var fare for eksplosjon
Då NRK snakka med politiet rundt klokka 23:00 kunne han fortelje at det framleis var fare for eksplosjon, og at brannvesenet var i gang med å prøve å slå ned flammane.
– Dei typar gassflasker det er snakk om her, acetylen og oksygen, må ifølgje brannvesenet kjølast ned i minimum 24 timar, så det vil bli ein lang innsats, sa dåverande innsatsleiar for politiet, Ole Wulvik
Men i løpet av natta vart dei kjølt ned så dei fekk kontroll på staden.
Rundt klokka 23.30 var framleis tre husstandar evakuerte, men i løpet av natta fekk alle lov til å flytte heim igjen.
I huset som er nærmast brannen var det ein hund igjen åleine, som dei ikkje fekk henta ut på grunn av eksplosjonsfaren.
Brannvesenet rykte ut med åtte bilar frå fleire stasjonar i området. Politiet kalla inn forsterkningar frå mellom anna nabobyen Kristiansund.
Evakuerte fekk flytte heim att
Ein av naboane som måtte evakuere er Laila Bøe. Ho omtalar flammane som svært store.
– Ein blir no litt i sjokk når det plutseleg er full fyr og flamme med naboen, seier Bøe.
Søndag kveld sat ho i bilen utanfor sperringane saman med hunden Grim.
I løpet av natta fekk alle dei evakuerte i nabohusa flytte heim igjen. Alle dyra som var i bygget skal ha blitt redda ut.