Korps til tusen

Korpsfolk i alle aldrar var i aksjon i Gomerhuset i Skodje laurdag. For nokre er det viktigaste å delta. Nokre gler seg til festen etterpå. Andre har ambisjonar om å ta med seg pokalane heim, etter månader med knallhard terping på detaljar.

Nordvesten for skulekorps og Tomra Ørskog Festivalen baud på spreke og nøye innøvde korpstonar dagen lang. Dommarane hadde ein utfordrande jobb med å få plassert korpsa i rett rekkefølge.

Arrangørfeide

Ørskog og Tomra byter på å arrangere festivalen annakvart år, og i år vart det ein skikkeleg arrangørfeide. For i 1. divisjon brass vann Ørskog, berre eitt poeng før arrangøren Tomra Brass Band frå Vestnes.

I andredivisjon vann Fræna Brass Band. Tresfjord Janitsjar tok førsteplassen i janitsjarklassen.

Gode skulekorps

Mange gode skulekorps var i aksjon. Kvam og Sellanrå skolekorps frå Molde vann førstepremien i 1. divisjon janitsjar, med Langmyra og Vestnes på dei neste plassane. Stordal skulekorps vann andredivisjon.

Tomrefjord skulekorps vann førstedivisjon for brasskorps.

Totalt var 750 skulekorpsmusikantar og 336 vaksne med i konkurransen.

– Dette er svært gledeleg, seier Nils-Gunnar Solli frå Molde. Han er regionstyreleiar i Norges Musikkorps Forbund. Spesielt var han glad for at heile 113 yngre barn var med på det store aspirantseminaret.

• Fullstendig resultatliste frå Nordvesten og Tomra Ørskog Festivalen