Kong Arthur vil fornye seg

Hopp til innhold

Noko av det viktigaste for dei som er med på spelet er å kunne fornye seg frå år til år. Når folk skal kome tilbake for å sjå spelet vil dei gjerne ha noko som er litt annleis frå eit år til eit anna.

Dette er noko både regissør og skodespelarar er opptekne av.

NRK er på Kongsvollen og får med seg ei av dei mange øvingane som er før premieren laurdag 9.august. Ikkje alle er samla på Kongsvollen denne litt grå dagen, men dei som er med gir full innsats.

Regissør Oddbjørn Anders Hagen leiar skodespelarane til sine plassar til dei ulike scenene og gir instruksar på førehand. Mange av skodespelarane er veteranar og kan sine saker etter fleire år i dei same rollene.

Sande og Wiik

Blant desse er Odd Kåre Wiik og Arild Sande. To karar som har underheldt folk i Sande og nabokommunane med humor i mange år. For humor er ein svært viktig ingrediens i spelet, kanskje den aller vikitgaste, seier Wiik til NRK.

I følgje heimesida til Kong Arthurspelet er dette eit humoristisk sogespel. Det vert framført på Sandsøya eller Dolsøya som øya heitte på Keltisk og gamalnorsk. Spelet si målgruppe er familien, men med humor som går på fleire nivå.

Sjå TV-reportasjen:

Kong Arthur-spelet

”Riddarar av det runde bord” var i fylgje legendene på Sandsøya (Dollsøy) for å leite etter "Ringskatten" og Den heilage Gral. Forskarar meiner at skatten skal vere gøymd i Dollsteinhola av Olav Ring (Arthur sin far).
Folketru og segn fortel at skatten i hola vert vakta av jøtulen Bruse. Som populærfigur kan vi i dag oppleve Arthur i fleire filmversjonar, kanskje mest kjend som Kong Arthur i dei kjende Monty Python-filmane og sist i filmen "King Arthur".

I oldtidssagaer står det mellom anna skrive at Kong Arthur rådde over store landområde. Eit av desse områda vart kalla Havlandet, og mange meiner i dag at det var Møre. Arthur vart hærførar av Britannia etter å ha drege sverdet "Excalibur" ut av steinen det stod i.

Arthur sin næraste rådgjevar, trollmannen Merlin, var med på kongen sine reiser. Også då han enda sine dagar på øya der skatten ligg. Kongen møter kjærleik, motstand, svik og siger på sine reiser. Med seg på si siste reise hadde han også ei gruppe nonner som pleia han etter at han tapte og vart såra i siste kampane i heimlandet.

Forfattarane av Kong Arthurspelet: f.v Odd Kåre Wiik, Astrid Saure,
Oddbjørn Hagen (regissør), Brit Gurskevik og Arild Sande.

Enkelte deler av manuset endrar seg frå år til år og kombinerer gamle segn med nyare konflikter og problemstillingar.
Manusforfattarane legg stor vekt på språket og har krydra dette med mange gamle lokale ord og uttrykk.

Arbeid, overtru, mystikk og trugande påtrengarar er kvardagen i ei tid der impulsane frå framande kulturar har starta sitt inntog.

Kjelde: Heimesida til spelet