Ho har enno ikkje fylt 18 år, men 17 år gamle Anna Grindvold frå Skeisdalen i Gjemnes står på andreplass på lista for Gjemnes Kristelig Folkeparti.
– Det var eigentleg heilt tilfeldig. Eg har alltid vore engasjert og vore leiar på ein rekke konfirmasjonsleirar, men eg har aldri hatt noko spesielt med politikk å gjere, seier Grindvold.
Fellesskap i kommunen er viktig
Som gardsjente er ho glad i natur, og gjerne lange turar i skog og mark. Denne dagen er det ein tur i Molde-marka som står på planen.
Grindvold er ikledd turklede og ei gul regnjakke. Det brune håret heng nedover skuldrene og ho smiler breitt.
– Eg vil beskrive meg sjølv som ei blid jente som alltid har eit smil på lur. Eg er veldig glad i familie og vener, og sjølvsagt å gå på tur i fjellet seier, ho.
Grindvold meiner at å vere blid og imøtekomande er ein viktig del av å vere politikar.
– Ja, det er mykje større sjanse for at nokon vil kome bort å prate med deg då enn om du er sur å grinete, seier ho og smiler igjen.
– Eg seier alltid hei til alle eg møter. Eg meiner det er viktig å ha eit fellesskap i kommunen som omfattar både gammal og ung, held ho fram.
- Les også:
Ikkje redd for å bli overkøyrd
17-åringen er klar over at ho er ein av dei yngre listekandidatane før haustens kommuneval, og at det kan by på utfordringar. Likevel fryktar ho ikkje å bli overkøyrd av dei meir erfarne politikarane.
– Det veit eg at eg blir. Eg er heilt ny, medan andre har vore engasjert i politikken i ei årerekke, seier ho.
Ho trur likevel at ho skal klare å stå imot.
– Då er det viktig at eg står for det eg meiner. Eg går opent inn i dette og tek det som ei slags læretid. Alle må starte ein plass, seier ho.
- Les også:
Er ikkje kristen
Til trass for at Grindvold stiller som listekandidat for KrF er ho ikkje personleg kristen. Det er ikkje eit problem, meiner 17-åringen.
– KrF har ein relevant politikk med mange gode valsaker som engasjerer meg. Dei setter menneske i sentrum, og det meiner eg er veldig viktig, seier ho.
– Du treng ikkje å vere kristen for å stemme på KrF, det er eit parti for alle, held ho fram før ho fortsett vidare på turvegen i eit hurtig tempo.
- Les også: