Arbeidarpartiet, Venstre og SV er først ute med nominasjonsmøte. Alle har møte i Molde laurdag.
NRK sin politiske kommentator Trond Vestre seier at det ulmar kraftig under overflata i Arbeidarpartiet.
Lokallaget i Kristiansund ønskjer ein annan toppkandidat enn Else May Botten. Trond Vestre reknar med at Botten endar opp på topp. Men han trur det blir ein tøff debatt.
I SV blir det kamp om førsteplassen. Nominasjonskomiteeen vil ha Yvonne Wold frå Rauma, medan andre kjempar for Line Karlsvik frå Kristiansund. Så gjenstår det å sjå om SV i det heile har sjanse til å kunne ta eit mandat i Møre og Romsdal.
Ingen kamp i Venstre
I Venstre blir det nok ingen kamp om førsteplassen. Stortingsrepresentant Pål Farstad endar nok opp der. Men også Venstre må kjempe for å kunne forsvare plassen på Mørebenken på Stortinget.
Blant partia med nominasjonsmøte seinare i haust er det mest ope i Framstegspartiet. Både fylkespolitikar Frank Sve frå Stranda og statsråd Sylvi Listhaug frå Ørskog vil ha førsteplassen.
I Høgre kan det bli kamp om andreplassen. Helge Orten frå Midsund er sikker på første, men Marianne Synnes frå Ålesund er sett opp på ein andreplass ho kjem til å bli utfordra på.
I Senterpartiet er Jenny Klinge sjølvskriven førstekandidat. Vestnes-ordførar Geir Inge Lien seier at han vil utfordre Marit Nerås Krogsæter frå Haram, som av komiteen er sett opp på andreplassen.
Kristeleg Folkeparti har den mest opne og spennande nominasjonsprosessen. Der er det førebels uklart kven som aspirerer til å kunne ta over etter Rigmor Andersen Eide.