– Du ser jo korleis han ser ut denne brusteinen her. Det er heilt forferdeleg, seier asfaltarbeidar Ronny Lillehovde frå Veidekke.
Statsbesøk på Fiskerstrand verft
Han er ein av mange som er i sving for å gjere Ålesund klart for kongeleg besøk onsdag.
Kong Harald og den litauske presidenten Dalia Grybauskaitė skal innom Fiskerstrand verft i Sula, på byvandring i Ålesund med besøk på Jugendstilsenteret og på omvisning på Høgskolen i Ålesund.
Grunnen til at kongen tar med seg litauens president til Fiskerstrand verft under det offisielle statsbesøket, er at Fiskerstrand BLRT AS er eit 50/50 samarbeidsselskap med Western Shipyard i Klaipeda i Litauen.
- Heile programmet kan du lese her på nettsidene til Kongehuset.
Skrur fast løparen
Den raude løparen er også på plass i Ålesund.
Olav Arne Sulebakk er formann i Ålesundsregionens hamnevesen. Han har sjølv tatt ansvaret for å få festa den raude løparen i trappa der kongen og presidenten skal i land etter besøket på Fiskerstrand verft i nabokommunen Sula.
– Vi har gjort dette nokre gongar før, så det trur eg skal gå bra. Vi er to mann som skal ta i mot fortøyingane i morgon. Men då blir det i ein litt anna habitt enn dette, seier Sulebakk.
Og dei som lappar asfalt er også trygge på at det skal gå greit i morgon.
– Det er ingen fare for at nokon skal ramle etter at vi har vore her, seier Ronny Lillehovde til NRK.
Sjå video om førebuingane her: