– Nei, eg skjønar ikkje korleis det går an å vere Rosenborg-supporter, gliser Bjørnar Mørkedal.
I Molde-drakt er han klar for kamp når serietoar Rosenborg besøker Aker Stadion. I kameratgjengen er Mørkedal éin av to i blå fargar saman med Henrik Fredriksen.
Lars Bolstad og Fredrik Rånes stiller i RBK si svarte bortedrakt.
– Eg kjem frå Trondheim, så då seier det seg sjølv kven eg held med, seier Bolstad.
Mykje humor
I Molde sentrum sit RBK-supporterane stort sett for seg sjølv, medan Molde-supporterane sit for seg. Kameratgjengen på fire klarer å sjå forbi rivaliseringa.
– Det er ekstremt mykje rivalisering internt. Men det er mykje humor også, fortel gjengen.
På kampen skal dei stå saman – like ved Kjernen, Rosenborg sin supportarklubb. Det trur dei vil gå bra, men dei to Molde-supporterane trur det vil gå dårleg for RBK i løpet av 90 minutt.
– Eg reknar med siger til Molde. Vi har vore det beste laget i årets sesong, har vore stabile, medan RBK har vore opp og ned, seier Bolstad.
– Og no har dei bytta trenar, det tek vi til vår fordel, legg han til.
Spørsmålet om korleis og kvifor RBK skal få med seg poenga tilbake til Trøndelag får svar kontant.
– Dei har nettopp fått ny trenar, noko som bør gi heile spelargruppa ein boost. Det bør slå positivt ut, samstundes som Molde-spelarane ikkje akkurat har imponert i det siste, meiner Rånes.
Likar seg på toppen
På den lokale Molde-puben sit mellom andre Randi Heder. Ho har dressa seg opp i Molde-fargar – frå topp til tå. Oppgjera mot Rosenborg er alltid noko ekstra, meiner ho.
– Eg trur det blir ein veldig bra kamp – med siger til Molde.
– Kva som må til for at Molde skal vinne?
– Det er ikkje så vanskeleg det, vi er vane til det, flirer ho.
– Molde-supporterane blir ikkje for kjepphøge no då?
– Nei da, vi blir ikkje det. VI må få glede oss når vi kan, smiler Heder – som tippar 3–1 som resultat.