Kine Kvalsund er i dag ein sentral spelar på eliteserielaget, men slik har det ikkje alltid vore.
– Då eg såg ho spele handball på første treninga, kan eg ikkje seie at eg trudde ho kom til å spele i eliteserien, seier trenar Halldór Stefán Haraldsson.
Sat på benken
Kvalsund byrja ikkje å spele før ho var 12 år. Og det var først då ho begynte å studere at ho verkeleg begynte å trene på handballen.
– Det var då eg skjønte at ein kan bli god med trening også, og ikkje berre med talent. Det var det som gjorde at eg følte eg kunne satse.
Dei første sesongane på 1. divisjonslaget blei det mykje benkesliting. Sjølv om Kvalsund møtte på alle treningane, klarte ho ikkje å prestere på bana.
– Eg blei jo ikkje tatt med. Eg sat på benken og fekk berre komme inn på bana dei 5 siste minutta.
Ikkje berre talent
Nyleg skreiv ein onkel eit ytring han kalla «Breiddefotballens skyggeside», etter at den 13 år gamle nevøen hans omtrent ikkje fekk vere med å spele på Norway Cup. «Eg er redd for at det er noko grunnleggande feil med barneidretten», skriv han. Norges Fotballforbund svarar at inkludering er eit felles ansvar, og at alle skal få delta.
Stig Arve Sæther er førsteamanuensis i idrettsvitskap ved NTNU, og forskar på ungdomsidrett og talentutvikling. Han seier det er stort fokus på talent i idretten, men kanskje utan grunn.
– Vi har ei slags feilslutning der vi tenker at om du er god som 7-åring så er du også blant dei beste når du er 20 år.
Sæther seier ein ikkje klarer å dokumentere i forsking at det er dei som er god i ung alder, som blir god seinare.
– Viss vi definerer at det er berre nokre utøvarar som er talent, og resten ikkje er interessante, då trur eg vi går glipp av veldig mange gode utøvarar.
– Fascinert
Tidlegare landslagsspelar og handballproff Anja Hammerseng-Edin, seier ein kan kome langt også ved å bruke tid på «benken».
– Historia til Kine viser at ho elskar det ho gjer. Nå du sit på benken er det mange spelarar som går inn i ein negativ spiral, der ein byrjar å gruble på om ein har det som skal til.
Hammerseng-Edin bruker seg sjølv og Heidi Løke som eksempel. Førstnevnte var sett på som eit barnetalent, medan Løke sat årevis på benken. Begge enda opp på landslaget. Hammerseng-Edin seier den mentale utviklinga er like viktig som å trene handball.
– Kine viser ein mentalitet eg blir veldig fascinert av.
Det ingen skulle tru
– Då eg gjekk på vidaregåande var det nok få som trudde at blant dei eg gjekk i klasse med, var det eg som skulle drive med idrett, seier Kvalsund.
Men det var likevel Kvalsund som skulle nå heilt til topps. Mykje takka vere trenar Haraldsson, som trengde ein spelar i front med ein sterk mentalitet. Ein som orka å trene, og viste eit godt eksempel.
– Eg såg frå dag ein at Kine hadde ein enorm innsats og treningsvilje.
Voldakapteinen har no signert ny kontrakt. I ein alder av 29 år er ho klar for debut i eliteserien.
– Ho viser at dersom du orkar å trene og orkar å stå i det så er alt mogleg, seier Haraldsson.