– Ja, det blir ei utfordring og få med båten herfrå, stadfestar skipper og båteigar Harald Øvstedal til NRK.
Han var til stades då båten Kåre Johan fekk sin første prøvetur på Ellingsøyfjorden tysdag. Det er derimot berre ein prøvetur, for snart skal han til Gjende – 1000 meter over havet.
Båten må fraktast sjøvegen frå Ålesund til Lærdal, før båten skal delast i tre.
– Den skal delast opp og så fraktast med lastebil på landevegen, så vi har igjen mange timar med arbeid før båten er i drift på Gjende, seier Øvstedal, som tek over båten 1. mai.
Spesiell båt
På innsjøen Gjende skal båten få oppgåva med å frakte fjellfolk inn i hjartet av Jotunheimen. Båten er kalla opp etter Kåre Johan Øvstedal (1944–2016) som var tredje generasjon skipper på Gjendebåten.
Frå starten av juni skal katamaranen Kåre Johan få frakte turistar og norske fjellfolk til og frå storslåtte Besseggen. Det måtte designaren bak båten tenkje på.
– Det er ikkje dei aller største sjøutfordringane oppå der, men det er ein båt som blir brukt heile tida av masse folk med store fjellsko med småstein under. Vi har vore nøydde til å lage ein bruksbåt, samstundes som det skulle bli noko nytt oppå vatnet der, fortel skipsdesignar Ola Lilloe-Olsen til NRK.
Onsdag var også Lilloe-Olsen på plass for å sjå Kåre Johan teste vatnet.
Første i Noreg?
Båten er bygd av Maritim Partner i Ålesund. Verftet fortel at oppdraget har vore spesielt.
– Båten er bygd i tre delar, styrehuset i éin seksjon, hovudsalongen i éin seksjon og skroget i éin seksjon. Difor er prosjektet vårt kanskje det første i Noreg av denne sorten, seier salssjef Rune Midtkandal i Maritim Partner.
Eigar Øvstedal var fornøgd med det han såg onsdag og omtalte det som «ein stor dag».
– Vi har jobba mot og planlagt dette i fleire år, så det er grunn til å heise flagget i dag.