Jugendfest tilbake til sentrum

Det nye festivalområdet kjem til å strekkje seg frå Posthuskrysset i aust til Brosundet i vest, skriv Momentium på sine nettsider.

– Jugendfest blir ti år neste år, så då vil vi gjere det endå større enn før, seier dagleg leiar i Momentium, Ronny Stokke.

– Det nye festivalområdet skal bli ugjenkjenneleg og utruleg kult!

Momentium har dei siste åra arrangert store konsertar og festivalar på Color Line-stadion. Planen om å flytte Jugendfest til byen er ein ide dei har jobba lenge med, fortel Stokke.

– Vi måtte finne på noko nytt og spektakulært. Dette er noko vi har ønska å få til ei stund, og vi har store planer og spennande nyheiter for festivalane når dei no flyttar til sørsida, seier han.

– Det er i sentrum festivalen høyrer heime

Jugendfest har utvikla seg til å bli ein av dei største festivalane i Noreg, og trekkjer mellom 22 000 og 24 000 menneske kvart år. Det byrja som ein byfestival, men blei etter kvart flytta til Color Line stadion.

– På mange måtar føler eg at vi tek Jugendfesten heim til sentrum, der vi meiner han høyrer heime, seier Ronny Stokke, og legg til at Color Line-stadion sette visse avgrensingar når det gjeld aktivitetar frå sponsorar, mattilbod og andre aktivitetar som Momentium stod bak.

Stokke ser eit stort potensiale i sørsida som festivalområde, sjølv om det vil kreve mykje logistikk.

– Sjølv om det er trangt i Ålesund sentrum, så ligg sørsida i utkanten, så vi treng ikkje stenge gater og ingen butikkar blir hardt ramma.

Pariserhjul og takbar

Ved å flytte festivalen, trur Stokke at publikum vil få ei betre totaloppleving av Jugendfest. Momentium lokkar også med ein eigen takbar og Europas største pariserhjul.

– Vi har eigne billettar til ein takbar oppe på eit av dei store bygga, med veldig god utsikt til den største scena og betre utval av mat og drikke. I tillegg prøver vi å få tak i Europas største flyttbare pariserhjul som vi vil sette på Stornespiren.

Billettsalet opnar 28. november og fram mot desember vil Momentium kome med to-tre aristslepp til Jugendfest, som går av stabelen 18. og 19. august.

Også Ålesund Live, som dei siste åra har vore arrangert på Sankten i Ålesund sentrum, blir flytta til sørsida.