Prosjektet er ein del av Sunnmøre museum si 1814-satsing og elevane i Ulstein tok turen til Borgarøya, den gamle handelsstaden, som ligg berre ein liten båttur unna Ulsteinvik sentrum.
Stor drift for 200 år sidan
For 150-200 år sidan var det fast handel på Borgarøya. Faktisk var det handel frå 1600-talet til cirka 1880. Handelstaden hadde på det meste 17 ulike bygningar.
Ingvill Wille som er formidlar seier at dei i vår har presentert prosjektet "Flåværleia" til 6. steget i Herøy, 9. steget i Ulstein og til alle klassestega på Sandshamn i Sande. Til hausten vert det ei ny runde med 10. steget i Herøy.
Tønnerulling
Noko av det kjekkaste elevane fekk oppleve var tønnerulling. To og to i gongen sparka tomtønner rundt hovudhuset på Borgarøya. Det vart ein underhaldande stafett, og både Håkon Rabben, Amanda Sundal og Andrine Garshol syntest det var kjekt.
– Det trigga konkurranseinstinktet, fortalde Amanda. Men det var vanskeleg å få til, meinte Håkon. Eg synest det er heilt supert å gjere noko anna å få sjå korleis dei gjorde det før.
Stiller spørsmål
Ingvill Wille seier at elevane stiller spørsmål heile tida. At dei er engasjerte og interesserte. Dette er ein annleis skuledag for dei der dei får bruke både kroppen og hovudet.
– Det er jo deira eiga historie som vert formidla og det er det å trekke dei lange linjene i den maritime historia til Noreg og "Flåværleia" er ein veldig god representant for akkurat dette.
På Borgarøya får elevane sjå det meste. Dei får prøve seg ute på sjøen i robåt og seglbåt. Dei får prøve å heise inn tønner til ei sjøbu frå ein båt og dei får lære om korleis folk budde og ikkje minst kvifor Borgarøya var viktig som knutepunkt i denne tidsperioden.
– Det som vart brukt mest på denne tida var jekter, fortel prosjektleiar Frode Pilskog. For øvrig var alle mulege båttypar i bruk. Det var robåtar og seglbåtar som frakta stort og smått.
Det var den viktigaste handeltrafikken i landet som passerte langs kysten her ute. Mellom anna når det var Lofotfiske og fisken skulle fraktast sørover, så ga Flåværleia le for dårleg ver.
"Flåværleia er sentral i Stiftinga Sunnmøre Museum si 1814 – 2014- markering. Den har eit mangfald av maritime installasjonar og historier. Flåværleia fortel om moderniseringa og samfunnsutviklinga i Noreg, som følgjer av trygg ferdsel sjøvegen, og har i uminnelege tider vore ei viktig seglingsleia for fartøy som kjem inn frå eller skal ut på Stadhavet."