Hadde den spesielle fønvinden frå Afrika som sveipa over distriktet i dag, vore litt meir på lag med bygdefolket i Tafjord, hadde dei sett ny noregsrekord for temperaturen i januar månad.
For at det skulle skje, måtte gradestokken vise 18 grader. Den gamle rekorden blei sett for 27 år sidan og er på 17,9 grader. I dag stansa rekordforsøket på 16,9 grader.
– Fole kjekt uansett!
Campingplasseigar Oddfrid Tafjord har i heile dag begeistra fortalt om korleis dei herlege varmegradene i Tafjord har verka inn på både henne sjølv og andre i bygda. Smilande og med latter i stemma har ho fortalt for folk i inn- og utland om det som kunne bli ein rekord-dag.
– Eg er slettes ikkje skuffa over at det ikkje blei nokon ny rekord på oss. Det har vore fole kjekt uansett å få plassert Tafjord på mediekartet. Vi har vore omgitt av ein positiv vind i heile dag, og det betyr mykje meir enn all verdas rekordar, ler ho.
Til NRK1 sa Oddfrid tidlegare i kveld, at vinden strauk lige godt rundt kjakane som kjærlege stryk frå ein kjærast.
Hivandes abassasdør for bygda
Den blidspente drivaren av Tafjord Camping har fått berre hyggelege tilbakemeldingar frå bygdefolket for engasjementet ho har vist både i radio, tv og aviser gjennom heile dagen.
– Nokre har sagt til meg at eg er ein hivandes ambassadør for bygda, og det er meir enn nok for meg! Det er så mykje elende elles i verda, at det er kjekt at vi kan bidra med noko positivt, smiler Oddfrid Tafjord.
Ho meiner at Tafjord har varme nok likevel, og seier tafjordingane ikkje er rekordstyrde.
– Varmen og dei gode temperaturane vi alltid har sommarstida, kan ingen ta frå oss, seier ho.
Kraftselskapet følgjer også med
Thor Gunnar Hovlid i Tafjord Kraftproduksjon følgjer som ein del av jobben, med på gradestokken.
– Temperaturen er viktig med tanke på snøsmeltinga i fjellet. Vi vil unngå overløp av vatn i magasina, og då må vi følgje med. Når det blir mildare går også straumforbruket ned, sa elektroingeniøren til NRK tidlegare i dag.
Så spørst det kva tid naturen igjen kan by på rekordvarme i Tafjord. Med dei store variasjonane i vêrlaget vi opplever denne vinteren, kan det skje raskarane enn nokon trur.