Rutebussen gjekk frå Sæbø klokka ni og var på veg til Ørsta då brannen starta, opplyser politiet. Ifølgje Mørenytt var det ein passasjer om bord i tillegg til sjåføren, men begge kom seg uskadd ut av bussen.
Bussen stod etter kvart i full fyr, og brannvesenet driv no med ettersløkking på staden. Sindre Kongshaug ved 110-sentralen seier at brannen var udramatisk.
– Bussen var fullstendig overtent, men det var rimeleg udramatisk sidan alle personane hadde kome seg ut av bussen. Det er det viktigaste, seier han.
Klokka 10.13 melde politiet at bussbrannen var sløkt.
Vegen vil bli rydda så snart det er mogeleg.