Hutrande kaldt i kyrkja

Kyrkjegjengarar i Haram må kle seg godt framover. Kyrkja må nemleg spare på straumen etter rekordkulda sist vinter.

Temperaturar på 13 - 14 grader er ikkje det kyrkjegjengarane er vande med. Men sprengkulda sist vinter førte til at kyrkjene i Haram brukte meir straum enn normalt. Dette førte til eit overforbruk på budsjettet på rundt 100.000 kroner.

- No må vi berre halde igjen det vi kan for å minske overforbruket, seier kyrkjeverje Hege Steinsland i Haram.

Må kle seg godt

Varmepumper i to av kyrkjene hjelper på, men fram til mars må kyrkjegjengarane i Haram kle seg godt, når dei skal til gudsteneste eller gravferd.

- På Fjørtoft har dei foreslått å kjøpe inn pledd og kansje servere ein varm kopp te. Det har også vore nemnt skjerf i liturgiske fargar og andre spreke forslag, seier Steinsland.

I varmen på Kulturkafeen engasjerer kyrkja si straumsparing.

- Viss vi er førebudde på det så kler vi godt på oss, seier Ingeborg Dalhaug.

Men det er mange høve det ikkje går an å ha så mykje kle på seg, til dømes i barnedåp, så litt varme må der no vere i alle fall, meiner Dalhaug.

Ordførar Bjørn Sandnes kan ikkje love meir pengar til varme.

- Vi er nøydde til å oppfordre til å halde budsjetta, og det gjer vi også på skular og omsorgsinstitusjonar.