Det er ein isfront mellom nybakt gullballvinnar Ada Stolsmo Hegerberg og store delar av fotball-Norge.
Ingen av landslagsspelarane har gratulert Hegerberg offentleg etter at ho vart kåra til verdas beste fotballspelar. Landslagssjef Martin Sjögren har ikkje hatt kontakt med Hegerberg på over eitt år.
Stemninga er ei heilt anna i Hegerberg si heimbygd Sunndal. Der heisa dei flagget for gullballvinnaren frå rådhuset tysdag.
– Det var veldig stort då Ada fekk prisen, men det var ikkje overraskande. Det var derimot fullt fortent, seier Eirin Melkild Loe, som sjølv har vore ein talentfull spelar.
– Det er heilt sjukt at nokon frå Sunndal kan bli verdas beste. Det er heilt magisk. Dette viser at alt er mogleg, seier tvillingane Mali og Hanna Bråten Gravem (14), begge ivrige fotballspelarar i Sunndal.
– Ekstrem treningsvilje
Den rutinerte trenaren Jarl Torske er i likskap med Ada Stolsmo Hegerberg frå Sunndal, og har dessutan hatt for ansvaret for den ferske gullballvinnaren på aldersbestemte landslag.
– Ada har ein ekstrem treningsvilje. Ho er eit treningstalent og ein vinnarskalle som har jobba målretta gjennom mange år, seier Torske.
Allereie då Hegerberg var 16 år tok Torske henne opp på U19-landslaget.
– Eg såg allereie då at ho var eit unikt spisstalent. Ho jaga mål og var oppteken av å prestere og å vinne, fortel Torske.
Fleire frå Sunndal
Også Guro Reiten, som i helga vart kåra til den beste spelaren i Toppserien, er frå Sunndal. Plussar vi på søstera til Ada, Andrine Stolsmo Hegerberg, har industribygda på Nordmøre fostra tre toppspelarar i løpet av vel to år.
– Sunndal er ein klubb som tidleg la til rette for jentefotball. Det er nedfelt i styret. Miljøet er unikt. Så var det nokre spesielt gode generasjonar som trena mykje, og trena også mykje saman med gutane, fortel Jarl Torske.
– Kan vi vente oss endå fleire toppspelarar frå Sunndal?
– Klart, slike generasjonar kjem ikkje ofte. Det er ein god generasjon med 13-14-åringar som kjem opp no. Eg trur det kjem fleire gode spelarar, om enn ikkje på det same nivået som Ada og Guro.
Styreleiar i Sunndal IL Fotball, Ivar Furu, bekreftar at miljøet i klubben har vore heilt spesielt med omsyn til kvinnefotball.
– Mange jenter spelte fotball. Det resulterte i ei ekstrem breidde. Det motiverte mange ekstra. Laga våre vann til dømes Norway Cup fleire år på rad, seier Furu.
Og kallar både Hegerberg og Reiten for fenomenale ambassadørar.