Onsdag kveld gjekk Rindals Trollstafett av stabelen med 81 lag som stilte til start. Snøen dei gjekk på er brukt og gjenbrukt mange gongar, for det har knappast vore nedbør sidan desember.
– Vi har fresa den same gamle snøen for «nte» gong, seier Håkon Solvik. Han er leiar i skigruppa i Rindal.
Henta snø
Ca 60 mann jobba på dugnad for å klargjere løypene før stafetten. Dei henta snø frå vatnet Igltjønna og frakta det til traseen.
Rindal likar å kalle seg skibygd og har ei lang skihistorie bak seg med OL-deltakarar og verdsmeistrar. Med stadion midt i sentrum har dei mange aktive langrennsløparar i barneklassene.
Ikkje fokus på talent
– Tel vi talet på dugnadstimar er det dårleg betalt i høve inntektene vi får inn, men det må til for å halde oppe renommeet vårt som skibygd, seier Solvik.
Han er levande oppteken av at flest mogleg barn skal ha lyst til å gå på ski.
– Det er berre fabelaktig kor mange barn som har vore aktive dei siste åra, seier Solvik. Han likar ikkje å snakke om talent ute i skiløypene. Fokuset er slett ikkje på dei som merkar seg ut, men å i eit breitt tilbod til alle som likar å gå på ski.