I ARV sine lokale i Ålesund heng det kåper på rekkje og rad. Her kan du lett finne detaljert kunnskap om alt frå pris på stoff, knappar og frakt, samt kva det kostar å produsere dei.
– For oss er det viktig å vere opne og ærlege med det vi gjer, og vi ønskjer å gjere kundane våre bevisste på kva dei betalar for når dei kjøper kle, seier dagleg leiar Maria Berggren.
–Inspirasjonen til å gjere dette har vi fått i USA. Stadig fleire blir meir bevisste på kva dei kjøper, og vil vite at det ikkje ligg korrupsjon, barnearbeid og andre dårlege forhold bak produktet, seier ho.
Å kunne spore ei vare er meir og meir vanleg i matindustrien, men breier seg og til andre næringar.
– Vi veit ikkje om nokon andre klesprodusentar som gjer dette i Norge, seier Berggren.
Stolte av ein lang kåpe-tradisjon i familien
Når Maria Berggren starta å lage kåper i lag med søster og svigerinne, var det etter arv frå oldefar og morfar.
– På 1920 talet starta oldefaren vår ein konfeksjonsfabrikk i Tomrefjord. Det blei fort ein av Norges leiande konfeksjonsfabrikkar. Vi lar oss inspirere av gamle kåpemodellar som var brukt heilt opp til 70-talet.
Les også:
Ho viser oss kåpa Ruth som er inspirert av teikningar frå 60 og 70-talet. Ved eit enkelt tastetrykk på nettsida finn ein detaljert kunnskap om kva det kostar å lage kåpa frå start til slutt.
Dette kostar det å lage ei kåpe
– Stoff til kåpa Ruth med for kostar ca. 365 kr. Logo, knappar osv. 10 kr, og det å sy den saman kostar ca. 300 kroner. Frakta hit kostar 30 kroner pr. kåpe. Totalkostnaden blir då 700 kroner. Vi sel den for 2999 kr. Differansen her dekkjer våre utgifter til å drive og utvikle ARV.
Arv sel ca 70 % av varene sine gjennom nettbutikk, resten gjennom sin butikk i Ålesund. Før selde dei kåpene gjennom andre sine butikkar. Då kosta ei kåpe ofte rundt 5000 kroner. Prisen gjorde at det blei vanskeleg å nå mange kundar.
– Vi valde å selje kåpene sjølve, fordi vi då kan ta ein mindre pris. Samtidig har vi no betre kontakt med kundane våre, seier Berggren.
Litt skremmande å vere så opne
–Når vi er så opne, så kan folk lett ta oss på å gjere feil. Det kan vere ting vi ikkje har gjort skikkeleg eller har gått glipp av. Men vi jobbar heile tida for å vere ærlege og gjere det skikkeleg, seier Berggren.