– Dette har vore ei lang, spennande reise. Men det er veldig tilfredsstillande å stå her i dag å skrive kontrakt, sa Trond Krogstadmo, regiondirektør i Skanska Bygg Midt/Nord.
Straks kontrakten er inngått startar også eit beinhardt og konfliktfylt arbeid. Heile prosjektet skal høvlast ned frå ein oppdatert kalkyle på over 5 milliardar ned til styringsramma på 4,4 milliardar norske kroner. Skanska sin del av prosjektet har ein forventa kontraktssum på 2,1 milliardar kroner.
– Prosjektet har hatt ein trang fødsel. Det har vore jobba lenge. Bølgene har vore store. Dette er ein stor dag for Nordmøre og Romsdal, sa leiar i prosjektstyret, Johan Arnt Vatnan då han signerte kontrakten.
Rettssaker, stortingshøyring og direktøravgang
Arbeidet fram mot dette sjukehuset har vore innom to rettssaker, det har vore høyring i Stortinget, direktørar har gått av og folk gått ut i gatene i protestaksjonar.
Sjukehuskonfliktar i Noreg brukar å vere sterke. Konflikten kring SNR er kanskje toppen av norske sjukehuskonfliktar. Framleis har sjukehusstriden kraft i seg til å sprenge heile Møre og Romsdal fylke.
Spiren til Bunadsgeriljaen
Med bygginga av Sjukehuset Nordmøre og Romsdal skal to sjukehus bli til eitt. Sjukehuset i Kristiansund blir lagt ned. Og det gamle sjukehusområdet like vest for Molde sentrum skal seljast. Det nye sjukehuset skal byggast på Hjelset, eit godt stykke aust for Molde sentrum.
Det viste seg å vere svært kontroversielt. Ei samling av fødetilbodet i Molde ville føre til svært lang reiseveg.
Men konfliktane kring det nye sjukehuset starta lenge før dette.
Direktøren gjekk på dagen
4. desember 2014 er ein av dei mest dramatiske dagane i striden kring det nye sjukehuset. Administrerande direktør Astrid Eidsvik, ein av leiarane i norsk helsevesen med lengst fartstid, trekkjer seg og går på dagen, etter intense djupe konfliktar. Det handla om lokalisering av det nye sjukehuset.
Eidsvik hadde brukt lang tid på å konkludere med at det var ein fordel å legge sjukehuset så langt nord i fylket som mogleg, og landa på området Storbakken ved Kristiansund.
Samtidig var administrasjonen i det regionale helseføretaket Helse Midt-Noreg i ferd med å konkludere med at sjukehuset burde ligge så langt sør som mogleg.
Hektisk møteverksemd og forsøk på overtaling førte til at Astrid Eidsvik kasta korta få dagar før ho skulle legge fram innstillinga si.
– I innspurten av arbeidet med sjukehusvalet har eg opplevd at Helse Midt-Norge har gripe inn på ein måte eg syns er uakseptabel, sa Astrid Eidsvik til NRK den dagen ho gjekk av.
Kaos og korrupsjonsskuldingar
Med Astrid Eidsvik sin avgang oppstod det både kaos og eit vakuum. Direktøren i det lokale helseføretaket hadde fått ferdig ei saksutgreiing, men ikkje noko tilråding overfor det lokale styret.
Men regionalt gjekk saksbehandlinga vidare. Det førte til at det lokale styret kjende innstillinga frå den regionale administrasjonen då vedtaket skulle gjerast.
I Kristiansund skjønte folk at det gjekk i favør av ei lokalisering i Molde, og at nordmørsbyen var i ferd med å misse sjukehuset sitt. Spontant blei faklane leitt fram og eit stort fakkeltog kransa kring julegrana på Kongens plass.
Ordførar Per Kristian Øyen kravde at heile sjukehussaka måtte stoppast umiddelbart.
Dramatisk styremøte
Det var blitt 17. desember 2014. Styret i Helse Møre og Romsdal skulle ta stilling til plasseringa av det nye sjukehuset. Sjeldan har vel eit styremøte i norsk helsevesen hatt større interesse. Tryggleiken kring møtet var skjerpa. Det var leigd inn ekstra tryggingsfirma. Alle som skulle inn på møtet blei kontrollerte.
Frå Nordmøre kom det 15.000 underskrifter med krav om at saka måtte utsetjast.
Dramaet toppa seg då styremedlem Harald Topphol sa han hadde fått opplysningar om at direktør Astrid Eidsvik var blitt pressa ut av direktørstolen. Det blei brukt ord som korrupsjon, utpressing og brot på helseføretakslova.
– Dersom dette stemmer, så lurer eg på om Noreg er eit demokratisk land, sa styremedlem Charles Austnes.
Nestleiar Petter Bjørdal, som tidlegare hadde hatt Storbakken i Kristiansund som favoritt ombestemte seg i siste liten og stemte for Hjelset i Molde.
– Konsekvensane vil bli minst ved å plassere dette i sør, med eit samarbeid mellom Ålesund og Molde, sa Bjørdal.
Dei påfølgjande to dagane sa både Helse Midt-Noreg og helseminister Bent Høie ja til ei plassering på Hjelset.
Banner og protestar i Kristiansund
Alle som kjenner sjukehusstridane i Møre og Romsdal skjønte straks at vedtaket ville føre til skarpe protestar frå Kristiansund og resten av Nordmøre.
Alt ved tusenårsskiftet var det klart at Molde trengte nytt sjukehus. Heilt fram til 8. desember 2018 var det liv i planane om å byggje nytt sjukehus på Eikrem i Molde.
Desse planane innebar at føde- og akutt-tenestene i Kristiansund skulle flyttast til Molde.
Ei rekkje gonger gjekk folk på Nordmøre i protesttog mot dette.
Det politiske miljøet i Kristiansund og på resten av Nordmøre var med på å lansere tanken om eit felles sjukehus mellom anna som ein måte å berge føde- og akutt-tenestene nord i fylket på.
Kristiansund kommune gjekk så langt at dei sikra seg ei stor tomt på Storbakken i Kristiansund, som dei ønskte å gje gratis til Helse Møre og Romsdal.
Store deler av det politiske miljøet på Nordmøre støtta tanken om eit felles sjukehus før lokaliseringa var avgjort.
– Vi stiller ei rekkje spørsmål til det som har skjedd og vil at kvar ein stein skal bli snudd for å finne ut korleis prosessen kunne havarere, sa lege i Kristiansund Ralph Herter.
Stortingshøyring og rettssaker
Og steinar blei snudd, både i rettssalen og i Stortinget.
Stortingshøyringa enda opp med at det ikkje blei fleirtal for nokon kritikk mot helseminister Bent Høie. Han var blitt skulda for å ha gripe inn i tomtevalet.
Deretter reiste Kristiansund kommune søksmål mot Helse Midt-Noreg.
Stemninga bygde på følgjande punkt:
- Myndigheitsmisbruk
- Brot på forvaltningslova om at ei sak skal vere godt opplyst
- Uforsvarleg kort saksbehandlingstid
- Mangel på reelle drøftingar i styremøte og føretaksmøte
- Inhabilitet for fleire av aktørane
- Omfattande manglar ved grunngjevinga.
I rettssaka blei det hevda at sjukehussaka var blitt gjennomført som ein pill rotten prosess.
Men Kristiansund kommune tapte saka i tingretten. Etter ei motsetnadsfylt debattrunde i Kristiansund kommune blei saka anka til lagmannsretten.
Sjølv om kommunen hevda dei la fram nye moment i saka, tapte Kristiansund kommune også i lagmannsretten.
Anbodsstans og utsetjing
Optimismen var stor då styret i Helse Midt-Noreg godkjende forprosjektet for det nye sjukehuset på Hjelset og distriktsmedisinsk senter i Kristiansund 7. desember 2017. Men det skulle gå berre nokre få månader før Helse Møre og Romsdal måtte konkludere med at heile anbodsprosessen måtte utsetjast. Prosjektet var i ferd med å sprekke med ein knapp milliard. Anbodsstansen kom så overraskande at begge dei gjenverande entreprenørane vurderte søksmål mot helseføretaket.
Midt i denne prosessen er Helse Møre og Romsdal midt i den djupaste økonomiske krisa nokon gong. Omfattande spareforslag fører til at dei fleste Nordmørskommunane bryt samarbeidet med Helse Møre og Romsdal.
Den økonomiske krisa er på dette tidspunktet så stor at administrerande direktør Espen Remme må gå av og Nils Kvernmo blir sett inn som konstituert direktør i Helse Møre og Romsdal.
SNR blir sendt ut på ei ny anbodsrunde og 25. september i år blir det kjent at Skanska skal byggje SNR. Det er allereie kjent at kostnadene skal kuttast kraftig. Berre få dagar før kontrakten skal signerast er det klart at prosjektet skal kuttast frå over 5 milliardar til om lag 4,4 milliardar kroner.
Entreprisen inneber ein samhandlingsperiode, der Sykehusbygg, Helse Møre og Romsdal og Skanska skal få prosjektet i samsvar med styringsramma. Dette arbeidet skal vere ferdig til sommaren.
Om eitt år skal anleggsarbeidet ta til. Og i mai 2024 er det planlagt innflytting i det nye sjukehuset.