Hopp til innhold

Heidra Bamba med fire tusen Spiderman-masker

Dei tilsette i Kristiansund kommune har klipt, limt og stifta dei siste vekene. – Eg har fått senebetennelse i høgrehanda, seier ordføraren.

Eliteserien 2017 Kristiansund-Sandefjord.

SPIDERMAN: Publikum var alle kledd i masker for å heidre Daouda Bamba då laga kom på bana.

Foto: Anders Tøsse / NTB scanpix

Då Kristiansund møtte Molde fekk Bamba gult kort fordi han feira med ei Spiderman-maske.

Det fekk kreativiteten til å boble i offentleg sektor.

– Måndagen etter kampen kom rådmannen inn på mitt kontor og spurde om vi skulle gjere noko til dagens kamp, forklarar Kristiansund-ordførar Kjell Neergaard før kampstart.

– No har vi trykt opp, klipt ut og stifta saman fire tusen masker som vi skal ha på når laga kjem på bana.

Kjell Neergaard

STOR JOBB: Kristiansund-ordførar Kjell Neergaard seier at både rådmann, brannvakta, familie og vennar har bidratt for å få maskene klare til kampen.

Foto: Roar Halten / NRK

– Vi er utruleg stolt over det KBK har fått til i år, og vi ville gjere noko spesielt for å heidre laget og motivere dei til kampen.

Maska var bursdagsgåve

Bamba fekk maska i bursdagsgåve av veslesøstera si, og tok den på då han feira målet mot Molde. Ordføraren meiner det gule kortet var unødvendig.

– Eg synest det var patetisk å gi gult kort for noko slikt. Det drog jo ikkje ut tida, seier Neergaard.

– Vi har lyst å heidre Bamba for jobben han gjorde mot Molde, konkluderer ordføraren.

Eliteserien fotball 2017, Molde - Kristiansund. (0-1)

GULT KORT: Kristiansund sin Daouda Bamba tok på denne maska for å feire 0–1 kampen mot Molde på Aker Stadion.

Foto: Svein Ove Ekornesvåg / NTB scanpix