– Dette er ei stor hending. Det seier polske Andrzej og Klaudia Los.
Paret har tatt oppstilling på verandaen sin i sentrum av Ålesund. Som mange andre har dei tatt med fotoapparata for å forevige naturen si framsyning.
- Les også:
– Dette er heilt utruleg. Du kan lese om det, men å sjå det er nesten ikkje råd å skildre, seier Klaudia Los.
– Det var nesten som noko frå ein science-fictionfilm. Vi har aldri sett noko slikt, så dette er fantastisk.
- Les meir: Nordlys
– Uvanleg sterkt
– Eg høyrde eit brøl då eg kom heim, seier Arild Giske i Ålesund.
Brølet kom frå dottera Sunniva på 13 og skuldast det heilt spesielle naturfenomenet som var på vitjing.
– Eg har sett nordlys fleire gongar, men ho har nok ikkje det, seier faren.
Dottera fekk eit bilete frå ei venninne som hadde sett nordlyset.
– Då var eg snar med å gå til vindauget og fekk sjå noko veldig sterkt og grønt der oppe.
Finast i Møre og Romsdal og Trøndelag
– Det er eit sterkt nordlys, og det er nok Nordvestlandet og Midt-Norge som har dei beste skyforholda i kveld, seier meteorolog Gunnar Livik.
Han seier det sterke lyset skuldast ei stor sky av partiklar frå sola.
– Det gjekk ut ei slik sky i dag tidleg, så dette er vel ein slags geomagnestisk storm, seier Livik.
I følgje meteorologen skal fenomenet vere synleg så langt sør som Spania og Italia.
Kø av folk
I Ålesund oppstod det nærast trafikkork opp mot utsiktspunktet Fjellstua i kveld. Mange hadde fått med seg det venta lysshowet og ville sjå det frå høgda over byen.
- Det har vore fleire hundre personar her oppe i kveld, seier Øyvind Dalhus. Han har tatt oppstilling med kamera på stativ saman med Tom Erling Larsen. Dei går ikkje ned frå fjellet før kamerabatteriet er flatt.
– Vi tenkte vi måtte prøve å komme oss litt opp og sjå, seier Marte Dahle. Saman med fleire vener har ho tatt turen opp på Fjellstua.
Dei gjekk opp, men såg at mange sleit med å kome fram med bil. Sjølv er ho ikkje i tvil om at det var verd turen.
– Det ser heilt fantstisk ut, seier ho.