– Det var ein av dei aller siste som blei levert før Ibanez blei dømde til å slutte å lage kopiar av, i dette tilfellet, Fender Jazz Bass, fortel Paul Krøvel til NRK.
Ein sjeldan bass, kjøpt som normal bass i 1979, er det Krøvel leitar etter. For etter 23 år i hendene, forsvann Ibanez-bassen i 2002. Krøvel omtalar det som ei litt spesiell historie.
Paul Krøvel skulle så gjerne funne igjen jazzbassen som han kjøpte i 1979. I 2002 var den søkk borte, men ikkje borte frå tankane til Krøvel.
Foto: Privat– Det var då eine sonen min skulle jamme med kameratar på ein hybel i Volda og fekk låne bassen litt, seier hobbybassisten.
Bassen blei ståande etter øving, før hybeleigaren måtte skifte hybel like etter. Bassen blei med på flytelasset i den tradisjonsrike studentbygda Volda.
– I den prosessen forsvann rett og slett bassgitaren. Den blei med på eit flyttelass og sidan har ingen sett den.
– Minst like god som originalen
Det var avisa Møre som første omtalte den heller uvanlege etterlysinga frå Krøvel. I avisa blir det skrive om fortida til Krøvel – og bassen. Som ein del av bandet Novus, store i nedslagsfeltet til Krøvel, fekk Ibanez-bassen køyrt seg.
I avisa Møre blei jazzbassen etterlyst fredag.
Foto: NRK– Han lét veldig godt, det var ein god bass å spele på, mimrar Krøvel i prat med NRK.
Ein heller habil bassist skal ha lånt bassen til Krøvel då han framleis hadde den. Tilbakemeldinga var at Ibanez-bassen – kopien – var minst like god som ein ekte Fender jazzbass.
Når Krøvel får høyre eit eksempel på korleis ein Ibanez-bass, lik den han sjølv eigde, høyrest ut, er reaksjonen enkel:
– Ja, eg kjenner han igjen, sjølv på ei heller dårleg telefonlinje, seier Krøvel.
«Bounce Frisørstudio»
I dag må sunnmøringen bruke ein annan bass når han møter kameratane i bandet. No, 15 år etter at den originale Ibanez-bassen forsvann, var det nok.
Ibanez-bassen som Krøvel eigde er frå tida då Ibanez blei saksøkt av ei rekkje gitarprodusentar. I dag er den eit samleobjekt. Den no etterlyste bassen var unik.
– Eg hadde skrudd deksla heilt bak på gitaren av og over mikrofonen lenger framme. Skruhola står igjen. I tillegg hadde gitarkassa nokre klistremerke, mellom anna stod det «Bounce Frisørstudio» på det eine, flirer Krøvel.
Krøvel veit ikkje om jazzbassen framleis finst på verken Sunnmøre eller i Noreg, men no er håpet at den raudbrune jazzbassen skal finne vegen tilbake.
– Ein eller annan der ute veit om dette her, ein eller annan har den, avsluttar sunnmøringen.
Høyr intervjuet med Paul Krøvel her:
Jazzbassen til venstre i bildet vil gjerne finne tilbake til Paul Krøvel.
Foto: Privat
